സൗദിയുടെ വരുമാനത്തില്‍ ആദ്യ പാദത്തില്‍ ഒമ്പത് ബില്യണ്‍ ഡോളറിന്റെ കുറവ്‌; പ്രതിസന്ധി കുറക്കാന്‍ നടപടിയുണ്ടാകും 

സൌദി അറേബ്യയില്‍ സാമ്പത്തിക വര്‍ഷത്തിന്‍റെ ആദ്യ പാദത്തില്‍ 9.07 ബില്യണ്‍ ഡോളറിന്‍റെ ബജറ്റ് കമ്മി രേഖപ്പെടുത്തി. കഴിഞ്ഞ വര്‍ഷത്തിലെ ആദ്യ പാദത്തെ അപേക്ഷിച്ച് 22 ശതമാനം കുറവാണ് വന്നത്. ഈ വര്‍ഷം ആദ്യ പാദത്തില്‍ ചിലവ് 226 ബില്യണ്‍ റിയാലാണ്. 192 ബില്യണ്‍ റിയാല്‍ വരവും. അതായത് 34 ബില്യണ്‍ റിയാലിന്‍റെ ബജറ്റ് കമ്മിയാണ് ഉണ്ടായത്. ഇതോടെ ഈ വര്‍ഷം ആദ്യ പാദത്തിലെ പൊതുകടം 723 ബില്യണ്‍‌ റിയാലാണ്.

എണ്ണയില്‍ നിന്നുള്ള വരുമാനം 24 ശതമാനമാണ് ഇടിഞ്ഞത്. എണ്ണേതര വരുമാനത്തില്‍ 17 ശതമാനവും ഇടിവ് വന്നു. കോവിഡ് പശ്ചാത്തലത്തില്‍ വരുമാനം കുറയുമെന്ന് സൌദി അറേബ്യ കണക്ക് കൂട്ടിയിരുന്നു. ഇതിന്റെ ഭാഗമായി ഈ വര്‍ഷം ചെലവ് ചുരുക്കാനാണ് പദ്ധതി. ചെറുകിട മേഖലയിലും ഇടത്തരം സ്ഥാപനങ്ങളിലും സാമ്പത്തിക പ്രയാസം രാജ്യം മുന്‍കൂട്ടി കാണുന്നുണ്ട്. ഇത് പരിഹരിക്കാന്‍‌ കണക്കാക്കിയുള്ള പദ്ധതികളും ധനകാര്യ മന്ത്രാലയത്തിന്റെ പരഗണനയിലാണ്.