യുഎഇയിൽ വാഹനാപകടങ്ങൾ വർധിക്കുന്നു

അമിത വേഗമാണ് അപകടങ്ങള്‍ക്ക് കാരണം

പിഴശിക്ഷ ഉൾപ്പടെ കടുത്ത നടപടികൾക്കിടയിലും യുഎഇയിൽ വാഹനാപകടങ്ങൾ വർധിക്കുന്നു. അമിത വേഗമാണ് അപകടങ്ങള്‍ക്ക് കാരണം. ഹൈവേകളിൽ വേഗപരിധി ലഘൂകരിച്ചും കൂടുതൽ ക്യാമറകൾ സ്ഥാപിച്ചും നിയമലംഘകരെ കണ്ടെത്താനാണ് അധികൃതര്‍ ശ്രമിക്കുന്നത്.

ഈ വർഷം ഡിസംബർ 23 വരെ യു.എ.ഇയിൽ ഉണ്ടായ റോഡപകടങ്ങളിൽ മരിച്ചത്​ 525 പേരാണെന്നാണ് ആഭ്യന്തര​ മന്ത്രാലയത്തിന്റെ കണക്ക്. ഇതിൽ 230 പേർ മരിക്കാൻ ഇടയായത്​ അമിത വേഗത്തില്‍ വാഹനമോടിച്ചത് കാരണമാണ്.

പുതിയ വിവരങ്ങളുടെ അടിസ്ഥാനത്തിൽ അമിത വേഗത്തിനെതിരെ ജനുവരി ഒന്ന്​ മുതൽ ദേശീയ തലത്തിൽ ബോധവത്​ക്കരണ പരിപാടികൾ ആരംഭിക്കും. അമിതവേഗം കൊലപാതകത്തിലെത്തരുതെന്ന മുദ്രാവാക്യമുയർത്തി നടത്തുന്ന ക്യാമ്പയിന്‍ മൂന്ന്​ മാസം നീളും. ഇതിന്റെ ഭാഗമായി സർവകലാശാലകളിലും സ്പോർട്സ്​ ക്ലബുകളിലും ബോധവൽക്കരണ ക്ലാസുകള്‍ സംഘടിപ്പിക്കുകയും ലഘുലേഖ വിതരണവും നടത്തും. ഷോപ്പിങ്​ മാളുകളിലും മറ്റ്​ സ്​ഥലങ്ങളിലും പ്രദർശനങ്ങളും മറ്റും ഉണ്ടാവുകയും ചെയ്യും. ഉപ പ്രധാനമന്ത്രിയും ആഭ്യന്തര മന്ത്രിയുമായ ശൈഖ്​ സൈഫ്​ ബിൻ സായജിന്റെ നേതൃത്വത്തിലായിരിക്കും ബോധവൽക്കരണ പരിപാടികൾ.

ഈ വർഷം 80 കിലോമീറ്റർ വേഗപരിധി ലംഘിച്ച്​ വാഹനമോടിച്ച 5395 പേരിൽ നിന്ന്​ ഫൈൻ ഈടാക്കിയിട്ടുണ്ട്​. ശൈഖ്​ സായദ്​ റോഡിലും എമിറേറ്റ്​ റോഡിലും പരമാവധി വേഗം കുറച്ചത്​ ഉള്‍പ്പെടെ നിരവധി നടപടികൾ സ്വീകരിച്ചത്​ ഫലം ചെയ്യുമെന്ന പ്രതീക്ഷയിലാണ്​ അധികൃതർ.