കോടതി നടപടി ക്രമങ്ങൾ 305 ദിവസത്തിൽ നിന്ന്​ 30 ദിവസമാക്കുന്നു; ​ അതിവേഗം നീതി ലഭ്യമാക്കുന്ന പദ്ധതിയുമായി​ ദുബൈ

ലോകത്താദ്യമായാണ്​ നീതിന്യായ രംഗത്ത് ഇത്തരത്തിലൊലു സംവിധാനം നടപ്പിലാക്കുന്നത്

കോടതി നടപടി ക്രമങ്ങൾ 305 ദിവസത്തിൽ നിന്ന്​ 30 ദിവസമാക്കി കുറച്ച്​ അതിവേഗം നീതി ലഭ്യമാക്കുന്ന പദ്ധതിക്ക്​ ദുബൈ തുടക്കമിടുന്നു. ലോകത്താദ്യമായാണ്​ നീതിന്യായ രംഗത്ത് ഇത്തരത്തിലൊലു സംവിധാനം നടപ്പിലാക്കുന്നത്.

പ്രാഥമിക കോടതി, അപ്പീൽ കോടതി, സുപ്രിം കോടതി എന്നിവിടങ്ങളിൽ ഒന്നിനു ശേഷം ഒന്നായി കേസ്​ വിചാരണ ​നടത്തുന്നതിനു പകരം ഒരേ സമയം വാദം കേട്ട്​ തീർപ്പാക്കുന്ന C3 ​കോടതി സംവിധാനത്തിന്​ ദുബൈ ഫ്യൂച്ചർ ഫൗണ്ടേഷൻ ചെയർമാനായ കിരീടാവകാശി ശൈഖ്​ ഹംദാൻ ബിൻ മുഹമ്മദ് ബിൻ റാശിദ്​ ആൽ മക്​തൂമിന്റെ നേതൃത്വത്തിലാണ്​ തുടക്കമിടുന്നത്​. ദുബൈയെ മറ്റു രാജ്യങ്ങളെക്കാൾ പത്തു വർഷം മുന്നിലെത്തിക്കുക എന്ന ദർശനത്തോടെ യു.എ.ഇ വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം പ്രഖ്യാപിച്ച ദുബൈ 10x പദ്ധതിയുടെ ഭാഗമായാണിത്​.

മൂന്ന്​ തട്ടിലായി നടക്കുന്ന ന്യായവാദങ്ങൾ മൂന്ന്​ കോടതികളിലെയും ജഡ്ജിമാരെ ഉൾക്കൊള്ളിച്ച ഒറ്റ കോടതിയിൽ നടത്തുന്ന രീതിയാണ്​ ആവിഷ്കരിക്കുന്നതെന്ന്​ ദുബൈ കോർട്സ്​ ഡയറക്ടർ ജനറൽ തറാഷ്​ ഈദ്​ അൽ മൻസൂരി വ്യക്തമാക്കി. എല്ലാ നടപടി ക്രമങ്ങളും ഇലക്​ട്രോണിക്​ ഫയലിങും റിമോട്ട്​ കമ്യൂനികേഷനും ഉൾപ്പെടെ ആധുനിക സാങ്കേതിക വിദ്യ പ്രയോജനപ്പെടുത്തിയാണ്​ ഒരുക്കുക.

സമയം ലാഭിക്കാനും നടപടി ക്രമങ്ങൾ എളുപ്പമാക്കാനും ചെലവ്​ കുറക്കാനും ഇതു സഹായിക്കും. C3 പദ്ധതി മുഖേന ഒരു കേസ്​ നടപടി ഒരു മാസത്തിലേറെ നീളില്ല എന്ന്​ ഉറപ്പാക്കാനാവും. ഇഴഞ്ഞു നീളുന്ന കോടതി വ്യവഹാരങ്ങൾ, വൈകുന്ന നീതി നടപ്പാക്കൽ എന്ന സാർവ ലോക പ്രതിഭാസത്തിന്​ അന്ത്യം കുറിക്കാനും ഇതു വഴി കഴിയും.