ജബൽ അഖ്​ദറിൽ ജല ശുദ്ധീകരണ ശാല നിർമിക്കുന്നു

ഒമാന്‍റെ എല്ലാ ഗ്രാമങ്ങളിലും നഗരങ്ങളിലും കുടിവെള്ളമെത്തിക്കണമെന്ന അതോറിറ്റിയുടെ തീരുമാനത്തിന്‍റെ ഭാഗമായാണ്​ പുതിയ ശുദ്ധീകരണശാലയുടെ നിർമാണം.

ഒമാനിലെ ജബൽ അഖ്​ദറിൽ ജല ശുദ്ധീകരണ ശാല നിർമിക്കുന്നു. സമുദ്രനിരപ്പിൽ നിന്ന്​ മൂവായിരം അടി ഉയരത്തിലുള്ള ജബൽ അഖ്​ദർ നിവാസികളുടെ കുടിവെള്ള ആവശ്യങ്ങൾ നിവർത്തിക്കുന്നതിന്​ ഒപ്പം വിനോദ സഞ്ചാരമേഖലയുടെ പുരോഗതിക്കും പദ്ധതി സഹായകരമാകും.

ജബൽ അഖ്​ദറിലെ കുടിവെള്ള ആവശ്യങ്ങൾ പരിഹരിക്കണമെന്ന ഏറെ നാളുകളായുള്ള ആവശ്യത്തിനാണ്​ ഇതോടെ പരിഹാരമാകുന്നത്​. ആഗസ്​റ്റിൽ പദ്ധതിയുടെ നിർമാണമാരംഭിച്ചതായി നിർമാണത്തിന്​ മേൽനോട്ടം വഹിക്കുന്ന വൈദ്യുതി ജല വിതരണ പൊതുഅതോറിറ്റി അധികൃതർ അറിയിച്ചു. അടുത്ത വർഷം പദ്ധതി പ്രവർത്തനമാരംഭിക്കും. പൂർണമായും പ്രവർത്തന സജ്ജമാകുന്നതോടെ പ്രതിദിനം 1.76 ദശലക്ഷം ഗാലൺ ആയിരിക്കും ശാലയുടെ ശേഷി. 38 കിലോമീറ്റർ ദൂരെവരെയുള്ള ഉപഭോക്​താക്കൾക്ക്​ ഇതോടെ കുടിവെള്ളം എത്തിക്കാൻ കഴിയും.

120 കിലോമീറ്റർ ദൈർഘ്യമുള്ള പൈപ്പ്​ലൈൻ വഴി ജബൽ അഖ്​ദറിന്‍റെ ഭാഗങ്ങളിലും കുടിവെള്ളമെത്തിക്കാൻ സാധിക്കും. പദ്ധതിയുടെ ഭാഗമായി എണ്ണൂറ്​ മുതൽ അയ്യായിരം ക്യുബിക്​ മീറ്റർ വരെ ശേഷിയുള്ള മൂന്ന്​ ജല ശുദ്ധീകരണ ശാലകൾ നിർമിക്കുമെന്നും നാസർ അൽ അബ്രി പറഞ്ഞു. ഒമാന്‍റെ എല്ലാ ഗ്രാമങ്ങളിലും നഗരങ്ങളിലും കുടിവെള്ളമെത്തിക്കണമെന്ന അതോറിറ്റിയുടെ തീരുമാനത്തിന്‍റെ ഭാഗമായാണ്​ പുതിയ ശുദ്ധീകരണശാലയുടെ നിർമാണം.