യു.എ.ഇയുടെ വിവിധ ഭാഗങ്ങളിൽ വീശിയടിച്ച വ്യാപക പൊടിക്കാറ്റ്​ ജനജീവിതം താറുമാറാക്കി

പുലർച്ചെ മുതൽ ആരംഭിച്ച കാറ്റ്​ വാഹന ഗതാഗത രംഗത്താണ്​ കൂടുതല്‍ പ്രശ്​നങ്ങളുണ്ടാക്കിയത്

യു.എ.ഇയുടെ വിവിധ ഭാഗങ്ങളിൽ വീശിയടിച്ച വ്യാപക പൊടിക്കാറ്റ്​ ജനജീവിതം താറുമാറാക്കി. പുലർച്ചെ മുതൽ ആരംഭിച്ച കാറ്റ്​ വാഹന ഗതാഗത രംഗത്താണ്​ കൂടുതല്‍ പ്രശ്​നങ്ങളുണ്ടാക്കിയത്​. രാജ്യത്തി​ന്റെ വിവിധ ഭാഗങ്ങളിൽ നിരവധി വാഹനാപകടങ്ങളും റിപ്പോർട്ട്​ ചെയ്​തു.

പകൽ പൂർണമായും പൊടിക്കാറ്റി​ന്റെ പിടിയിലമർന്ന സ്​ഥിതിയിലായിരുന്നു ദുബൈ ഉൾപ്പെടെ യു.എ.ഇയിലെ മിക്ക എമിറേറ്റുകളും. ദൃശ്യപരിധി നന്നെ കുറഞ്ഞതിനാൽ നിരവധി വാഹനാപകടങ്ങളാണുണ്ടായത്​. അബൂദബി, ദുബൈ, ഷാർജ ഉൾ​െപ്പടെ മിക്ക എമിറേറ്റുകളിലും അപകടങ്ങൾ റിപ്പോർട്ട്​ ചെയ്​തിട്ടുണ്ട്​. വിമാനത്താവളങ്ങളുടെ പ്രവർത്തനത്തെയും പൊടിക്കാറ്റ്​ ബാധിച്ചു. ദുബൈ വിമാനത്താവളത്തിൽ നിന്നുള്ള ചില സർവീസുകളുടെ സമയക്രമം പുന:ക്രമീകരിക്കേണ്ടി വന്നു. അര ഡസനോളം വിമാനങ്ങൾ വൈകിയതിനു പുറമെ ഒരു സർവീസ്​ റദ്ദാക്കിയതായും ദുബൈ വിമാനത്താവള അധികൃതർ വ്യക്​തമാക്കി.

തീരമേഖലകളിൽ കാറ്റ്​ കൂടുതൽ ശക്​തമാണ്​. 2000 മീറ്ററിൽ താഴെയാണ്​ കാഴ്​ച പരിധി. വാഹനയാത്രികരും കടലിൽ പോകുന്നവരും കർശന ജാഗ്രത പുലർത്തണമെന്ന്​ ദേശീയ കാലാവസ്​ഥ നിരീക്ഷണ കേന്ദ്രം മുന്നറിയിപ്പ്​ നൽകി. മൂടിക്കെട്ടിയ കാലാവസ്​ഥയാണെങ്കിലും താപനില ഉയരാൻ സാധ്യതയുണ്ട്​. 45.4 ഡിഗ്രിയാണ്​ ബറഖയിൽ രേഖപ്പെടുത്തിയ ഉയർന്ന ചൂട്​. ആസ്മ പോലുള്ള അസുഖമുള്ളവർ, വയോധികർ, കുട്ടികൾ എന്നിവർ പുറത്തിറങ്ങു​മ്പോൾ പ്രത്യേക ​​ശ്രദ്ധ പുലർത്തണമെന്നും പൊടിക്കാറ്റ്​ ആരോഗ്യ ​പ്രശ്​നങ്ങൾക്ക്​ വഴിവെച്ചേക്കുമെന്നും വിദഗ്​ധർ നിർദ്ദേശിച്ചു.