ഗൾഫ്​ പ്രതിസന്ധിയിൽ ​അമേരിക്കൻ നയം അവ്യക്​തം

ട്രംപി​ന്‍റെ ഖത്തർ വിരുദ്ധ പ്രസ്​താവനയെ പിന്തുണച്ച സൗദി അനുകൂല രാജ്യങ്ങൾ, ഉപരോധം പിൻവലിക്കണമെന്ന അമേരിക്കൻ വിദേശകാര്യ സെക്രട്ടറിയുടെ പ്രസ്താവനയെ കുറിച്ച്​ ഒന്നും പ്രതികരിച്ചതുമില്ല.

ഗൾഫ്​ പ്രതിസന്ധിയിൽ അമേരിക്ക ​കൈകൊള്ളുന്ന നിലപാടിൽ അവ്യക്​തത തുടരുന്നു. ട്രംപി​ന്‍റെ ഖത്തർ വിരുദ്ധ പ്രസ്​താവനയെ പിന്തുണച്ച സൗദി അനുകൂല രാജ്യങ്ങൾ, ഉപരോധം പിൻവലിക്കണമെന്ന അമേരിക്കൻ വിദേശകാര്യ സെക്രട്ടറിയുടെ പ്രസ്താവനയെ കുറിച്ച്​ ഒന്നും പ്രതികരിച്ചതുമില്ല.

ഖത്തറിനു മേൽ നിലനിൽക്കുന്ന ഉപരോധ സമാനമായ സാഹചര്യം പിൻവലിക്കണമെന്നായിരുന്നു യുഎസ്​ വിദേശകാര്യ സെക്രട്ടറി റെക്​സ്​ ടില്ലേഴ്​സൺ കഴിഞ്ഞ ദിവസം ആവശ്യപ്പെട്ടത്​. എന്നാൽ തീവ്രവാദ നിലപാടും നടപടികളും ഖത്തർ​ ഉപേക്ഷിക്കണമെന്ന നിലപാട്​ തുടർച്ചയായി ആവർത്തിക്കുകയായിരുന്നു പ്രസിഡന്‍റ് ട്രംപ്​. ട്രംപി​ന്‍റേത്​ സ്വാഗതാർഹമായ പ്രതികരണമാണെന്ന്​ സൗദി അനുകൂല രാജ്യങ്ങൾ പ്രസ്​താവനയിൽ വ്യക്​തമാക്കി. പ്രസിഡന്‍റും വിദേശകാര്യ സെക്രട്ടറിയും പറഞ്ഞതിന്‍റെ വൈരുധ്യം സംബന്​ധിച്ച ചോദ്യത്തിന്​ രണ്ടും ഒരേ നിലപാട്​ തന്നെയാണെന്ന്​ വിശദീകരിക്കുകയായിരുന്നു വൈറ്റ്​ ഹൗസ്​ വക്​താവ്​.

പ്രശ്​നത്തിൽ അമേരിക്ക സ്വീകരിക്കാൻ പോകുന്ന നിലപാട്​ എന്തായിരിക്കും എന്നതും ദുരൂഹമായി തുടരുകയാണ്​. വൈറ്റ്​ഹൗസിൽ സമവായ ​ചർച്ചക്ക്​ വേദിയൊരുക്കാമെന്നായിരുന്നു നേരത്തെ ട്രംപി​ന്‍റെ അഭ്യർഥന. എന്നാൽ അതിനു വേണ്ടത്ര പിന്തുണ ലഭിച്ചില്ല. ഇരുകൂട്ടരും തങ്ങളുടെ നിലപാടിൽ ഉറച്ചു നിൽക്കുന്നതോടൊപ്പം പരമാവധി രാജ്യങ്ങളുടെ പിന്തുണ ഉറപ്പാക്കാനുള്ള തിരക്കിട്ട നീക്കത്തിലാണ്​.

പ്രതിസന്ധി മറികടക്കാൻ തുർക്കി, ഇറാൻ എന്നീ രാജ്യങ്ങളുടെ പിന്തുണ തേടിയ ഖത്തർ നടപടിയും വിമർശത്തിനിടയായി. ഖത്തറിൽ വരുന്ന തങ്ങളുടെ സൈന്യം ഏതെങ്കിലും ഒരു രാജ്യത്തിനു മാത്രമല്ലെന്നും എല്ലാ ഗൾഫ്​ രാജ്യങ്ങളുടെയും സുരക്ഷ മുൻനിർത്തിയാണെന്നും തുർക്കി പ്രസിഡന്‍റ് ഉർദുഗാൻ ബഹ്​റൈൻ വിദേശകാര്യ മന്ത്രി ശൈഖ്​ ഖാലിദ്​ ബിൻ അഹ്​മദ്​ ആൽ ഖലീഫയുമായി നടന്ന ചർച്ചയിൽ അറിയിച്ചു. ഖത്തർ വിദേശകാര്യ മന്ത്രിയാവ​ട്ടെ, പിന്തുണ തേടി യൂറോപ്യൻ രാജ്യങ്ങളിൽ പര്യടനം തുടരുകയാണ്​. അമേരിക്ക ഉൾപ്പെടെ വൻശക്​തി രാജ്യങ്ങളും യുഎന്നും വിഷയത്തിൽ സജീവമായി ഇടപെടുമെന്ന സൂചന തന്നെയാണ്​ പുറത്തുവരുന്നത്​.