രൂപ കൂപ്പുകുത്തുന്നു, ഗള്‍ഫില്‍ നിന്നും നാട്ടിലേക്ക് പണമയക്കാന്‍ തിരക്ക്

പഞ്ചാബ്​ നാഷനൽ ബാങ്ക്​ കുംഭകോണത്തി​ന്‍റെ പശ്ചാത്തലത്തിൽ പൊതുമേഖലാ ബാങ്കുകളിൽ നിന്നും ഇറക്കുമതിക്കാരിൽ നിന്നും ഡോളറിനുണ്ടായ വൻ ആവശ്യകതയാണ്​ രൂപക്ക്​ തിരിച്ചടിയായത്​.

കഴിഞ്ഞ രണ്ടു ദിവസങ്ങളിലായി രൂപ കൂപ്പു കുത്തുന്ന സാഹചര്യം മുൻനിർത്തി യു.എ.ഇ ഉൾപ്പെടെ ഗൾഫിലെ പണമിടപാട്​ സ്​ഥാപനങ്ങളിൽ വലിയ തിരക്ക്​. മാസങ്ങളായി രൂപക്ക്​ ലഭിച്ച മേൽക്കൈ ഗൾഫ്​ കറൻസികളുമായുള്ള വിനിമയത്തിൽ പ്രവാസികൾക്ക്​ സാമ്പത്തിക നഷ്​ടം വരുത്തിയിരുന്നു. ഈ അവസ്​ഥക്കാണിപ്പോൾ മാറ്റം സംഭവിച്ചിരിക്കുന്നത്​.

ഡോളറിനെതിരെ രൂപക്ക്​ ഈ വർഷത്തെ ഏറ്റവും വലിയ തകർച്ചയാണിപ്പോൾ നേരിടുന്നത്​. രണ്ടു ദിവസം കൊണ്ട്​ ഒന്നര രൂപയിലേറെയാണ്​ ഇടിഞ്ഞത്​. ഗൾഫ്​ കറൻസികളും ഇന്ത്യൻ രൂപയുമായുള്ള വിനിമയത്തിലും ഇത്​ ​ പ്രകടമാണ്​. ഒരു ദിർഹത്തിന്​ 17 രൂപ 64 പൈസ എന്നതാണ്​ യു.എ.ഇയിലെവിനിമയ നിരക്ക്​.

പഞ്ചാബ്​ നാഷനൽ ബാങ്ക്​ കുംഭകോണത്തി​ന്‍റെ പശ്ചാത്തലത്തിൽ പൊതുമേഖലാ ബാങ്കുകളിൽ നിന്നും ഇറക്കുമതിക്കാരിൽ നിന്നും ഡോളറിനുണ്ടായ വൻ ആവശ്യകതയാണ്​ രൂപക്ക്​ തിരിച്ചടിയായത്​. വിദേശ നിക്ഷേപകരും ആഗോള വ്യാപാരികളും ആഭ്യന്തര ഓഹരികളിൽ നിന്ന്​ വൻതോതിൽ പണം പിൻവലിക്കുന്ന പ്രവണതയും രൂപക്ക്​ ​ദോഷം ചെയ്​തു. രൂപയുടെ ഇടിവ്​ അടുത്ത മാസവും തുടർന്നേക്കും എന്നാണ്​ സാമ്പത്തിക വിദഗ്​ധർ നൽകുന്ന സൂചന. ഏപ്രിൽ മധ്യത്തോടെ മാത്രമാകും ഇതിൽ മാറ്റം വരികയെന്നും അവർ വ്യക്​തമാക്കുന്നു.

പ്രതീക്ഷിക്കാതെ ലഭിച്ച നേട്ടം ഉപയോഗ​പ്പെടുത്താൻ മണി എക്​സ്​ചേഞ്ച്​ ബ്രാഞ്ചുകളിൽ നല്ല തിരക്കാണിപ്പോൾ അനുഭവപ്പെടുന്നതും.