ഇന്ത്യൻ രൂപയുടെ വിലയിടിവ്​ കുറച്ചു കാലം കൂടി തുടർന്നേക്കുമെന്ന്​ വിദഗ്​ധർ

എണ്ണവില വർധനയെ തുടർന്ന്​ രൂപപ്പെട്ട ഇന്ത്യൻ രൂപയുടെ വിലയിടിവ്​ കുറച്ചു കാലം കൂടി തുടർന്നേക്കുമെന്ന്​

എണ്ണവില വർധനയെ തുടർന്ന്​ രൂപപ്പെട്ട ഇന്ത്യൻ രൂപയുടെ വിലയിടിവ്​ കുറച്ചു കാലം കൂടി തുടർന്നേക്കുമെന്ന്​ വിദഗ്​ധർ. ആഗോള വിപണിയിൽ എണ്ണവില സന്തുലിതമാകുന്നതിനെയും റിസർവ്​ ബാങ്കിന്റെ ബദൽ നടപടികളെയും ആശ്രയിച്ചിരിക്കുകയാണ്​ രൂപയുടെ വിനിമയമൂല്യത്തി​ന്റെ ഭാവി. എണ്ണവിലയിൽ ഉണ്ടായ വർധനയും മറ്റു സാമ്പത്തിക സാഹചര്യങ്ങളുമാണ്​ ഇറക്കുമതി രാഷ്​ട്രമായ ഇന്ത്യയുടെ രൂപക്ക്​ തിരിച്ചടിയായത്​. സമീപകാലത്ത്​ ഒന്നുമില്ലാത്തവിധം കനത്ത ആഘാതമാണ്​ രൂപ നേരിടുന്നത്​. ഡോളറുമായുള്ള അന്തരം വർധിച്ചത്​ ഇറക്കുമതി ഉൽപന്നങ്ങളുടെ ​നിരക്കും ഗണ്യമായി ഉയർത്തി.

ഗൾഫ്​ കറൻസികളുമായുള്ള വനിമയ മൂല്യം ഇടിഞ്ഞത്​ പ്രവാസ​ ലോകത്തെ ലക്ഷക്കണക്കിന്​ ഇന്ത്യക്കാർക്ക്​ താൽക്കാലികമായെങ്കിലും സാന്ത്വനമായി മാറുകയാണ്​. വൈകാതെ ദിർഹത്തിന്​ 19 രൂപയായി വിനിമയ മൂല്യം ഉയർന്നേക്കുമെന്ന റിപ്പോർട്ടുകളും പുറത്തു വരുന്നുണ്ട്​. ആഗോള വിപണിയിൽ എണ്ണവില ഇനിയും വല്ലാതെ കൂടാൻ ഇടയില്ലെന്ന്​ കരുതുന്നവരാണ്​ കൂടുതൽ.

റിസർവ്​ ബാങ്ക്​ ശക്​തമയ നടപടികൾ കൂടി സ്വീകരിക്കുകയാണെങ്കിൽ മൂല്യതകർച്ച കുറെയൊക്കെ പിടിച്ചു നിർത്താൻ കഴിയുമെന്നു കരുതുന്നവരും ഉണ്ട്​. പ്രവാസികൾക്ക്​ ലഭിച്ച അനുകൂല സാഹചര്യം അവർ നന്നായി ​പ്രയോജനപ്പെടുത്തുന്നുണ്ടെന്നാണ്​ ധനകാര്യ വിനിമയ സ്​ഥാപനങ്ങളിലെ തിരക്ക്​ കാണിക്കുന്നത്​. നാട്ടിലേക്ക്​ പണം അയക്കുന്നതിൽ ആറു മുതൽ എട്ടു ശതമാനം വരെ വർധന ഉണ്ടെന്നാണ്​ വിനിമയ കേന്ദ്രങ്ങൾ വ്യക്​തമാക്കുന്നത്​.