ബഹ്റൈനിൽ പ്രവാസി തൊഴിലാളികളുടെ വർക് പെർമിറ്റിന് പരിധി നിശ്ചയിക്കണമെന്ന നിർദേശം തള്ളി ശൂറാ കൗൺസിൽ

മനാമ: ബഹ്റൈനിൽ പ്ര​വാ​സി​ക​ൾ​ക്കു​ള്ള വ​ർ​ക്ക് പെ​ർ​മി​റ്റു​ക​ളു​ടെ എ​ണ്ണ​ത്തി​ൽ ദേ​ശീ​യ പ​രി​ധി നി​ശ്ച​യി​ക്ക​ണ​മെ​ന്ന പാർലമെന്റ് നിർദേശം തള്ളി ശൂറാ കൗൺസിൽ. വർക് പെർമിറ്റിൽ നിയന്ത്രണമേർപ്പെടുത്തിയാൽ ബഹ്റൈനിലെ തൊഴിൽ വിപണിയെ അത് നേരിട്ട് ബാധിക്കുമെന്ന് ചൂണ്ടിക്കാട്ടിയാണ് നിർദേശം ശൂറാ കൗൺസിൽ തള്ളിയത്. നിയമം നടപ്പിലായാൽ ബഹ്റൈനിലെ നിക്ഷേപകരുടെ വിശ്വാസം ദുർബലപ്പെടുകയും തൊ​ഴി​ലാ​ളി​ക​ൾ അ​ന​ധി​കൃ​ത തൊ​ഴി​ലി​ലേ​ക്ക് തി​രി​യു​ക​യും ചെയ്യുമെന്നും ശൂറാ കൗൺസിൽ വിലയിരുത്തി.

2006 ലെ ലേബർ മാർക്കറ്റ് റെഗുലേറ്ററി നിയമത്തിലെ ആർട്ടിക്കിൾ നാല് ഭേദഗതി ചെയ്യാനുള്ള നിർദേശമാണ് തള്ളിയിരിക്കുന്നത്. എല്ലാ മേഖലകളിലും അനുവദിക്കുന്ന പെർമിറ്റുകൾക്ക് കർശനമായ പരിധി നിശ്ചയിക്കാൻ ലേബർ മാർക്കറ്റ് റെഗുലേറ്ററി അതോറിറ്റിയെ നിർബന്ധിതമാക്കുന്നതായിരുന്നു ഭേദ​ഗതി. എന്നാൽ, ഇതിന്റെ പ്രത്യാഘാതങ്ങൾ വിലയിരുത്തിയ ശൂറാ കൗൺസിൽ ഐക്യകണ്ഠമായി നിയമഭേദ​ഗതി സംബന്ധിച്ച നിർദേശം തള്ളുകയായിരുന്നു.

പെ​ർ​മി​റ്റിന് പ​രി​ധി നിശ്ചയിക്കുന്നതിലൂടെ സ്വദേശി പൗ​ര​ന്മാ​രു​ടെ തൊ​ഴി​ൽ വ​ർ​ധി​പ്പി​ക്കു​ന്ന​തി​ന് കാര്യമായ പ്രയോജനം ഉണ്ടാകില്ലെന്ന് തൊ​ഴി​ൽ മ​ന്ത്രാ​ല​യ​വും വിലയിരുത്തി. ബഹ്റൈനിൽ ക്വാട്ട അടിസ്ഥാനമാക്കിയുള്ള സംവിധാനമല്ല പ്രവർത്തിക്കുന്നതെന്നും ഓരോ വാണിജ്യ രജിസ്ട്രേഷനും ബിസിനസ് പ്രവർത്തനത്തിനും അനുസരിച്ച് ഇതിനകം പരിധികൾ നിശ്ചയിക്കുന്നുണ്ടെന്നും എൽഎംആർഎ ചീഫ് എക്സിക്യൂട്ടീവ് നിബ്രാസ് താലിബ് വ്യക്തമാക്കി.