വിവിധ ന​ഗരങ്ങളിലേക്കും തിരിച്ചുമുള്ള സർവീസുകൾ റദ്ദാക്കി ഒമാൻ എയറും സലാം എയറും

മസ്കത്ത്: മേഖലയിലെ വിമാനത്താവളങ്ങൾക്കും വ്യോമപാതകൾക്കും ഏർപ്പെടുത്തിയ നിയന്ത്രണങ്ങളെത്തുടർന്ന് ഒമാൻ എയറും സലാം എയറും നിരവധി സർവീസുകൾ റദ്ദാക്കി. മാർച്ച് 6 മുതൽ മാർച്ച് 8 വരെയുള്ള ദിവസങ്ങളിൽ ഒമ്പത് ന​ഗരങ്ങളിലേക്കുള്ള വിമാനങ്ങളാണ് റദ്ദാക്കിയതെന്ന് ഒമാൻ എയർ അറിയിച്ചു. ദുബൈ, കുവൈത്ത് സിറ്റി, മനാമ, ദോഹ, ദമ്മാം, ഖസബ്, അമ്മാൻ, കോപ്പൻഹേഗൻ, ബാഗ്ദാദ് എന്നിവിടങ്ങളിലേക്കും തിരിച്ചുമുള്ള സർവീസുകളാണ് റദ്ദാക്കിയത്. മറ്റു സർവീസുകൾ നിലവിൽ നിശ്ചയിച്ച പ്രകാരം പ്രവർത്തനം നടത്തുമെങ്കിലും സമയക്രമത്തിൽ മാറ്റങ്ങളോ താമസമോ ഉണ്ടായേക്കാമെന്നും ഒമാൻ എയർ വ്യക്തമാക്കി.

ഏഴ് വിവിധ വിദേശ ന​ഗരങ്ങളിലേക്കുള്ള സർവീസുകളാണ് സലാം എയർ താത്കാലികമായി നിർത്തിവെച്ചത്. ഇറാൻ, ഇറാഖ്, ലെബനാൻ എന്നീ രാജ്യങ്ങളിലേക്കും തിരിച്ചുമുള്ള വിമാനങ്ങൾ മാർച്ച് 28 വരെ റദ്ദാക്കി. കുവൈത്ത് സിറ്റി, ഷാർജ, ദോഹ, ദമ്മാം നഗരങ്ങളിലേക്കുള്ള സർവീസുകൾ മാർച്ച് 20 വരെയും നിർത്തിവെച്ചു. പ്രദേശിക സാഹചര്യങ്ങൾ മാറുന്നതിനനുസരിച്ച് അറിയിപ്പുകളിൽ മാറ്റം ഉണ്ടായേക്കാമെന്നും എയർലൈനുകൾ വ്യക്തമാക്കി. അപ്ഡേറ്റുകൾ എയർലൈനുകളുടെ ഔദ്യോ​ഗിക പേജുകൾ വഴി അറിയിക്കും.