ഇസ്രായേൽ കുടിയേറ്റ കേന്ദ്രങ്ങളിൽ നിന്നുള്ള ഉൽപന്ന ഇറക്കുമതി നിരോധനം; അയർലൻഡ് നടപടി സ്വാഗതം ചെയ്ത് ഖത്തർ
ഫലസ്തീൻ ജനതയുടെ അവകാശങ്ങൾക്ക് നേരെയുള്ള നഗ്ന ആക്രമണമാണ് കുടിയേറ്റത്തിലൂടെ ഇസ്രായേൽ ചെയ്യുന്നതെന്ന് ഖത്തർ വിദേശകാര്യ മന്ത്രാലയം
ദോഹ: ഇസ്രായേൽ കുടിയേറ്റ കേന്ദ്രങ്ങളിൽ നിന്നുള്ള ഉൽപന്നങ്ങൾ ഇറക്കുമതി ചെയ്യുന്നത് നിരോധിച്ചുകൊണ്ടുള്ള നിയമം പാസാക്കിയ അയർലൻഡ് നടപടിയെ സ്വാഗതം ചെയ്ത് ഖത്തർ. അധിനിവേശത്തെയും അനധികൃത കുടിയേറ്റ നയങ്ങളെയും തടയാനുള്ള ശ്രമങ്ങളെ പിന്തുണക്കുന്ന നടപടിയാണിയെന്ന് ഖത്തർ വിശേഷിപ്പിച്ചു. കൂടുതൽ രാജ്യങ്ങൾ അയർലൻഡിന്‍റെ നടപടി പിന്തുടരുമെന്ന പ്രതീക്ഷയും പ്രകടിപ്പിച്ചു.
ഇസ്രായേൽ കുടിയേറ്റം അന്താരാഷ്ട്ര നിയമങ്ങളുടെയും പ്രത്യേകിച്ച് യുഎൻ സുരക്ഷാ കൗൺസിൽ പ്രമേയം 2334 ന്‍റെയും നഗ്നമായ ലംഘനമാണ്. ഫലസ്തീൻ ജനതയുടെ അവകാശങ്ങൾക്ക് നേരെയുള്ള നഗ്നമായ ആക്രമണവുമാണ് കുടിയേറ്റത്തിലൂടെ ഇസ്രായേൽ ചെയ്യുന്നതെന്ന് ഖത്തർ വിദേശകാര്യ മന്ത്രാലയം വ്യക്തമാക്കി.
അധിനിവേശ ഫലസ്തീൻ പ്രദേശങ്ങളിലെ കുടിയേറ്റ നയം അവസാനിപ്പിക്കാൻ ഇസ്രായേലിനെ നിർബന്ധിക്കാൻ നിയമപരവും ധാർമികവുമായ ഉത്തരവാദിത്തം അന്താരാഷ്ട്ര സമൂഹം നിറവേറ്റേണ്ടതുണ്ട്.
അന്താരാഷ്ട്ര നിയമത്തിന്റെയും 1967 ലെ അതിർത്തി അനുസരിച്ച് സ്വതന്ത്ര ഫലസ്തീൻ രാഷ്ട്രം സ്ഥാപിക്കുന്നത് ഉറപ്പുനൽകുന്ന ദ്വിരാഷ്ട്ര പരിഹാരത്തിന്റെയും അടിസ്ഥാനത്തിൽ ഫലസ്തീനിനെയും ഫലസ്തീൻ ജനതയെയും പിന്തുണക്കുന്ന നിലപാട് ഖത്തർ തുടരുമെന്നും വാർത്തക്കുറിപ്പിൽ അറിയിച്ചു.
Adjust Story Font
16