യു.എ.ഇയിൽ 2030ഓടെ 6ജി എത്തും: ധാരണാപത്രത്തിൽ ഒപ്പുവെച്ചു

ദുബൈ: യു.എ.ഇയിൽ 2030ഓടെ 6ജി എത്തും. ഇതിന്​ മുന്നോടിയായുള്ള നടപടികൾക്കായി ഇമാറാത്തി ടെലികമ്മ്യൂണിക്കേഷൻ കമ്പനിയായ 'ഡു' വും(Du) ബഹുരാഷ്ട്ര കമ്പനിയായ 'വാവെ'യും(Huawei) ധാരണാപത്രത്തിൽ ഒപ്പുവെച്ചു. ഇരുകമ്പനികളും ദീർഘകാല പങ്കാളിത്തത്തിനാണ്​ ഞായറാഴ്ച ബാഴ്സലോണ മൊബൈൽ വേൾഡ് കോൺഗ്രസിൽ ഒപ്പുവെച്ച കരാറിലൂടെ തുടക്കം കുറിച്ചിരിക്കുന്നത്.

നിലവിൽ 5ജി നടപ്പിലാക്കിയ രാജ്യത്ത്​ ആദ്യഘട്ടത്തിൽ 5.5ജി എത്തിക്കാനാണ്​ ധാരണാപത്രത്തിൽ തീരുമാനമായിട്ടുള്ളത്​. സാങ്കേതിക നവീകരണത്തിലൂടെ ഉപയോക്തൃ അനുഭവം മെച്ചപ്പെടുത്താനും 5.5ജി വികസനം എളുപ്പമാക്കാനും കരാർ സഹായിക്കും. ​ലോകത്ത്​ പല രാജ്യങ്ങളും 3ജി, 4ജി നെറ്റ്​വർക്കുകളിൽ തുടരുമ്പോഴാണ്​ യു.എ.ഇ 6ജിക്ക്​ വേണ്ട മുന്നൊരുക്കം ആരംഭിച്ചിരിക്കുന്നത്​.

പശ്ചിമേഷ്യയിലെ മൊബൈൽ ടെക്​നോളജി വിപണിയുടെ വലിയ ശതമാനം നേടിയെടുക്കാൻ ലക്ഷ്യംവെച്ചാണ്​ 'ഡു' സുപ്രധാന നീക്കം നടത്തിയിട്ടുള്ളത്​. 5.5ജി ടെക്​നോളജിയുടെ നവീന പദ്ധതികൾ എത്തിക്കാൻ ധാരണാപത്രത്തിലൂടെ 'ഡു'വിന്​ സാധിക്കും. പുതിയ സാഹചര്യങ്ങളെക്കുറിച്ച് ഗവേഷണം നടത്തുകയും പ്രാദേശിക ആവശ്യകതകളെ അടിസ്ഥാനമാക്കി മെറ്റാവേർസ്, ഹോളോഗ്രാഫിക് മീറ്റിങ്​, എക്സ്.ആർ പോലുള്ള ആപ്ലിക്കേഷനുകൾ നടപ്പിലാക്കുകയും ചെയ്യും.

ഡിജിറ്റൽ നവീകരണത്തിൽ മുൻനിരയിൽ തുടരാൻ സഹായിക്കുന്ന പുതിയ ആശയങ്ങൾ കണ്ടെത്തുന്നതിന്​ ലോകമെമ്പാടുമുള്ള വ്യവസായ പ്രമുഖരുമായി പ്രവർത്തിക്കാൻ കമ്പനി പ്രതിജ്ഞാബദ്ധമാണെന്ന്​ കരാർ സംബന്ധിച്ച്​ 'ഡു' സി.ടി.ഒ സലീം അൽ ബലൂഷി പറഞ്ഞു. യു.എ.ഇയുടെ മെറ്റാവേഴ്​സ്​ നയത്തിന് അനുസൃതമായി, 'വാവെ'യുമായുള്ള പങ്കാളിത്തം വാണിജ്യപരമായ ഉപയോഗത്തിന് 5.5ജി സാങ്കേതികവിദ്യ ലഭ്യമാക്കുക എന്ന ലക്ഷ്യം കൈവരിക്കാൻ 'ഡു'വിനെ പ്രാപ്തമാക്കും.