ദുബൈ എക്സ്പോയിലേക്ക് സൗജന്യ ബസ് സർവീസ്
' എക്സ്പോ റൈഡർ' എന്ന പേരിൽ 126 ബസുകളാണ് ആർ.ടി.എ നിരത്തിലിറക്കുക
ദുബൈ യിൽ നടക്കുന്ന വേൾഡ് എക്സ്പോ നഗരിയിലേക്ക് എത്താൻ സൗജന്യ ബസ് സർവീസ്. ദുബൈ റോഡ്സ് ആൻഡ് ട്രാൻസ്പോർട്ട് അതോറിറ്റിയാണ് ഇതിന് വഴിതെളിക്കുന്നത്. ഒമ്പത് ഇടങ്ങളിൽ നിന്നായിരിക്കും എക്സ്പോയിലേക്ക് സൗജന്യ ബസ് സർവീസ് ഉണ്ടാവുക. എക്സ്പോ റൈഡർ' എന്ന പേരിൽ 126 ബസുകളാണ് ആർ.ടി.എ നിരത്തിലിറക്കുക. ദുബൈയുടെ വിവിധ ഭാഗങ്ങളിൽ നിന്നായിരിക്കും സർവീസ്. ഇതിന് പുറമെ ഹോട്ടലുകളിൽ നിന്നുള്ളവരെ എക്സ്പോയിലെത്തിക്കാനും ബസുകൾ ഏർപെടുത്തും. പാർക്കിങ് ഏരിയയിൽ നിന്ന് യാത്രക്കാരെ എക്സ്പോ ഗേറ്റിലേക്കെത്തിക്കാനും ബസ് ഉണ്ടാകും. ഫെറി വഴി വരുന്നവർക്ക് വേണ്ടിയും പ്രത്യേക ബസ് ഏർപെടുത്തും. ശനി മുതൽ വ്യാഴം വരെ എല്ലാ ദിവസവും 1956 സർവീസുകൾ നടത്തും. വ്യാഴം, വെള്ളി ദിനങ്ങളിൽ ഇത് 2203 ആയി ഉയരും. മൂന്ന് മിനിറ്റ് മുതൽ 60 മിനിറ്റ് വരെ ഇടവിട്ടായിരിക്കും സർവീസ്.
എക്സ്പോയിലേക്ക് യാത്രക്കാരെ സ്വീകരിക്കാൻ എല്ലാ ഒരുക്കങ്ങളും പൂർത്തിയാക്കിയെന്ന് ആർ.ടി.എ എക്സിക്യൂട്ടീവ് ഡയറക്ടർ ബോർഡ് ചെയർമാൻ മത്താർ മുഹമ്മദ് അൽതായർ പറഞ്ഞു. ഉയർന്ന സുരക്ഷയും ആഡംബര നിലവാരവുമുള്ള ബസുകളാണ് ഇതിനായി ഇറക്കിയിരിക്കുന്നത്. കാർബൺ ബഹിർഗമനം കുറഞ്ഞ യൂറോ 6 മാനദണ്ഡങ്ങൾ പാലിക്കുന്ന ബസുകളാണിവ. പാർക്കിങ് ഏരിയയിൽ നിന്ന് മൂന്ന് ഗേറ്റുകളിലേക്കാണ് സർവീസ് ഉണ്ടാവുക.. അബൂദബി, അൽ ഐൻ, ഫുജൈറ, അജ്മാൻ, റാസൽഖൈമ എന്നിവിടങ്ങളിൽ നിന്നും ബസ് സർവീസ് ഉണ്ടാവും.. ഈ സർവീസുകൾ സൗജന്യമല്ല.
Adjust Story Font
16