ഊദ് മേത്തയിൽ പുതിയ ബസ്​ സ്​റ്റേഷൻ: വിപുലമായ പാർക്കിങ്​ സൗകര്യം

ദുബൈ ഊദ് മേത്തയിൽ വിപുലമായ സൗകര്യങ്ങളോടെ മാതൃകാ ബസ്​​ സ്റ്റേഷൻ യാഥാർഥ്യമായി. യാത്രക്കാരുടെ വാഹനങ്ങൾ പാർക്ക് ചെയ്യാനുള്ള സൗകര്യവുമുണ്ട്. എട്ടു റൂട്ടുകളിലായി 40 ബസുകളാകും ഇവിടെ നിന്നു സർവീസ് നടത്തുകയെന്നും കൂടുതല്‍ യാത്രക്കാര്‍ക്കിത് പ്രയോജനം ചെയ്യുമെന്നും ദുബൈ റോഡ്സ് ആൻ‍ഡ് ട്രാൻസ്പോർട് അതോറിറ്റി അറിയിച്ചു.

9,640 ചതുരശ്ര മീറ്റർ വിസ്തൃതിയിൽ ആണ്​ നിർമാണം. പ്രതിദിനം 10,000 യാത്രക്കാരെ സ്വീകരിക്കാനുള്ള സൗകര്യം ഇവിടെയുണ്ട്​. എട്ടു റൂട്ടുകളിലായി 40 ബസുകളാകും ഇവിടെ നിന്നു സർവീസ് നടത്തുക. മൾട്ടി ലെവൽ പാർക്കിങ് ടെർമിനലാണ് ഇവിടെ സജ്ജീകരിച്ചിട്ടുള്ളത്. 350 കാറുകൾക്ക് ഒരു സമയം പാർക്ക് ചെയ്യാവുന്നതാണ്​ ഈ സൗകര്യം.

ബസ് സ്റ്റേഷ​ന് വെറും 300 മീറ്റർ അടുത്തായുള്ള ഊദ് മേത്ത മെട്രോ സ്റ്റേഷനിൽ നിന്ന് ട്രെയിൻ, ടാക്സി സേവനങ്ങളും ലഭ്യമാകും എന്ന മെച്ചം കൂടിയുണ്ട്​. കാർ പാർക്കിങ് കൂടാതെ, 23 ബൈക്ക് റാക്ക്, ഓഫീസിനുള്ള സ്ഥലം, കസ്റ്റമർ സർവീസ് ഏരിയ, വ്യാപാര ഔട് ലറ്റുകൾ, സെൽഫ് സർവീസ് കിയോസ്കുകൾ എന്നിവയും പുതിയ ബസ് സ്റ്റേഷ​ന്റെ പ്രത്യേകതകളാണ്​. പൊതു ഗതാഗത സേവന രംഗത്തെ നൂതന ആശയത്തിന്റെ സാക്ഷാത്​കാരം കൂടിയാണിതെന്ന്​ ആർ.ടി.എ ചെയർമാൻ മത്തർ അൽ തായർ പറഞ്ഞു.