പുതുവത്സരാഘോഷം: 43 മണിക്കൂർ തുടർച്ചയായ സർവീസുമായി ദുബൈ മെട്രോ

ദുബൈ: പുതുവത്സരപ്പിറവി ആഘോഷിക്കാൻ എത്തുന്ന ലക്ഷക്കണക്കിന് ആളുകളുടെ യാത്ര സുഗമമാക്കുന്നതിനായി ദുബൈ മെട്രോ തുടർച്ചയായി 43 മണിക്കൂർ സർവീസ് നടത്തും. ഡിസംബർ 31 ബുധനാഴ്ച രാവിലെ 5 മണിക്ക് ആരംഭിക്കുന്ന മെട്രോ സർവീസുകൾ ജനുവരി 1 വ്യാഴാഴ്ച അർധരാത്രി 11.59 വരെ നീണ്ടുനിൽക്കും. റെഡ്, ഗ്രീൻ ലൈനുകളിൽ ഒരുപോലെ ഈ സേവനം ലഭ്യമായിരിക്കും. ഇതിനുപുറമെ ദുബൈ ട്രാമും ബുധനാഴ്ച രാവിലെ 6 മുതൽ വെള്ളിയാഴ്ച പുലർച്ചെ 1 മണി വരെ നിർത്താതെ സർവീസ് നടത്തും. ഡൗൺടൗൺ ദുബൈ ഉൾപ്പെടെയുള്ള പ്രധാന ആഘോഷ കേന്ദ്രങ്ങളിൽ തിരക്ക് നിയന്ത്രിക്കുന്നതിനായി വിവിധ ഘട്ടങ്ങളിലായി റോഡ് നിയന്ത്രണങ്ങളും ഏർപ്പെടുത്തിയിട്ടുണ്ട്. ആഘോഷങ്ങളിൽ പങ്കെടുക്കാൻ എത്തുന്നവർ പരമാവധി പൊതുഗതാഗത സംവിധാനങ്ങൾ ഉപയോഗിക്കണമെന്ന് ആർ.ടി.എ നിർദേശിച്ചു.