നിയാദി പകുതി ദൂരം പിന്നിട്ടു; ഗവേഷണ നടപടികളിൽ പുരോഗതി, ആഗസ്​റ്റ്​ അവസാനം മടങ്ങും

അന്താരാഷ്ട്ര ബഹിരാകാശ നിലയത്തിൽ യു.എ.ഇയുടെ സുൽത്താൻ അൽ നിയാദിയുടെ ദൗത്യം പകുതി ദൂരം പിന്നിട്ടു. ഏറ്റെടുത്ത ഗവേഷണങ്ങൾ ഭാഗികമായി നിർവഹിക്കാനും കഴിഞ്ഞു. ആഗസ്​റ്റ്​ അവസാനത്തോടെ നിയാദിയുടെ ബഹിരാകാശ ദൗത്യം പൂർത്തിയാകും.

എല്ലാ പ്രതിസന്ധികളും മറികടന്ന്​ മൂന്ന്​ മാസം ബഹിരാകാശ നിലയത്തിൽ ചെലവിടാൻ സുൽത്താൻ അൽ നിയാദിക്ക്​ സാധിച്ചു. ഏറ്റവും ദീർഘിച്ച അറബ്​ ബഹിരാകാശ ദൗത്യം കൂടിയാണിത്​. അസാമാന്യമായ ഇഛാശക്​തിയോടെ ലക്ഷ്യം നിറവേറ്റാൻ ശ്രമിക്കുന്ന സുൽത്താൻ അൽ നിയാദിയെ ഭരണാധികാരികൾ അഭിനന്ദിച്ചു.

നാസയുടെ മിഷൻ കമാൻഡർ സ്റ്റീഫൻ ബോവൻ, പൈലറ്റ് വാറൻ ഹോബർഗ്, റഷ്യൻ ബഹിരാകാശ യാത്രികൻ ആൻഡ്രേഫെഡ് യാവേവ് എന്നിവർക്കൊപ്പം സൽത്താൻ അൽ നിയാദി മാർച്ച്​ മൂന്നിനാണ്​ ബഹിരാകാശ നിലയത്തിൽ എത്തിയത്​​.

മനുഷ്യനെ വഹിച്ചുള്ള ചാന്ദ്ര യാത്രകൾക്കായി തയ്യാറെടുക്കാൻ സഹായിക്കുന്നതുൾപ്പെടെ 250 ഗവേഷണ പരീക്ഷണങ്ങൾ സംഘം പൂർത്തിയാക്കും. ഇവയിൽ 20പരീക്ഷണങ്ങൾ അൽ നിയാദി സ്വന്തം നിലക്കാണ്​​ നിർവഹിക്കുക​. ബഹിരാകാശ നടത്തം പൂർത്തിയാക്കാൻ സാധിച്ചതും നിയാദിക്ക്​ നേട്ടമായി.