അപൂർവ നമ്പറുകളുടെ ലേലം; 'വൺ ബില്ല്യൻ മീൽസി'ന് ​ലഭിച്ചത്​ 5.3കോടി ദിർഹം

വാഹന നമ്പർ പ്ലേറ്റ്​ ലേലത്തിലൂടെ യു.എ.ഇ ആവിഷ്​കരിച്ച ​ 'വൺ ബില്ല്യൻ മീൽസ്​' പദ്ധതിയിലേക്ക്​ വൻതുക സമാഹരിച്ചു. 5.3കോടി ദിർഹമാണ്​ പദ്ധതിയിലൂടെ ലഭിച്ചത്. വിവിധ രാജ്യങ്ങളിൽ പദ്ധതിയിലൂടെയുള്ള ഭക്ഷണ വിതരണം പുരോഗമിക്കുന്നുണ്ട്.

രണ്ടു മണിക്കൂർ നീണ്ട ലേലത്തിലാണ്​ ലോകത്താകമാനമുള്ള നിരാലംബർക്ക്​ സഹായമെത്തിക്കുന്ന പദ്ധതിയിലേക്ക്​ 5.3 കോടി ദിർഹം സമാഹരിക്കാൻ കഴിഞ്ഞത്​.. ഇതോടെ റമദാനിൽ ആരംഭിച്ച സംരംഭത്തിന്​ആകെ ലഭിച്ച സംഭാവനകൾ 39.1കോടി ദിർഹത്തിലെത്തി. മോസ്റ്റ് നോബൽ നമ്പേഴ്​സ്​ ചാരിറ്റിയാണ്​ ലേലം സംഘടിപ്പിച്ചത്​. നാല്​ അപൂർവ വാഹന നമ്പറുകളും 10ഫാൻസി ​ഫോൺ നമ്പറുകളുമാണ്​ ലേലം ചെയ്തത്​.

ഒറ്റ അക്ക വാഹന പ്ലേറ്റ് നമ്പർ AA8 ആണ്​ ഏറ്റവും കൂടുതൽ പണം നേടിയത്​. 3.5കോടി ദിർഹമാണ്​ ഇതിന്​ ലഭിച്ചത്​. 54 999 9999 എന്ന മൊബൈൽ നമ്പർ 50ലക്ഷം ദിർഹത്തിനും ലേലത്തിൽ പിടിച്ചു. V66, F55 എന്നീ നമ്പർ പ്ലേറ്റുകൾ​40ലക്ഷം വീതവും Y66 എന്ന നമ്പർ പ്ലേറ്റ്​ 38ലക്ഷം ദിർഹവുമാണ്​ നേടിയത്​. ലേലം വരുന്ന ആഴ്ച്ചയിലും തുടരുമെന്ന്​ അധികൃതർ വ്യക്​തമാക്കിയിട്ടുണ്ട്​. അബുദാബി പോലീസ് 555 വാഹന പ്ലേറ്റ് നമ്പറുകൾക്കായി ഓൺലൈൻ ലേലം സംഘടിപ്പിക്കുന്നുണ്ട്​. അബുദാബിയിലെ എമിറേറ്റ്‌സ് പാലസിൽ രണ്ടാം മോസ്റ്റ് നോബൽ നമ്പേഴ്‌സ് ചാരിറ്റി ലേലം ബുധനാഴ്ചയാണ്​ നടക്കുക.

ലോകമെമ്പാടുമുള്ള 50 രാജ്യങ്ങളിലെ നിരാലംബർക്കും ദരിദ്രർക്കും സഹായം നൽകാൻ ലക്ഷ്യമിടുന്ന 1ബില്യൺ മീൽസ് സംരംഭത്തിന് കീഴിൽ ഇന്ത്യയടക്കമുള്ള രാജ്യങ്ങളിൽ ഭക്ഷ്യവസ്തുക്കൾ വിതരണം ചെയ്യുന്നുണ്ട്​. അരി, എണ്ണ, പഞ്ചസാര, ഈത്തപ്പഴം തുടങ്ങിയ അടിസ്ഥാന ഭക്ഷണപദാർഥങ്ങൾ അടങ്ങിയ ഭക്ഷണപ്പൊതികളാണ്​ വിതരണം ചെയ്യുന്നത്​. മുഹമ്മദ്​ ബിൻ റാശിദ്​ ആൽ മക്​തൂം ഗ്ലോബൽ ഇനിഷ്യേറ്റീവ്‌സ് സംഘടിപ്പിക്കുന്ന സംരംഭം, ഫുഡ് ബാങ്കിങ്​ റീജിനൽ നെറ്റ്‌വർക്കി​ന്‍റെയും മുഹമ്മദ് ബിൻ റാഷിദ് അൽ മക്തൂം ഹ്യൂമാനിറ്റേറിയൻ ആൻഡ് ചാരിറ്റി എസ്റ്റാബ്ലിഷ്‌മെന്‍റിന്‍റെയും സഹകരണത്തോടെയാണ്​ വിതരണം നിർവഹിക്കുന്നത്​.