അവിടെ ചൂട്, ഇവിടെ തണുപ്പ്...; ആഗസ്റ്റ് ഏഴ് വരെ യുഎഇയുടെ ചില ഭാഗങ്ങളിൽ മഴക്ക് സാധ്യത

അബൂദബി: ആഗസ്റ്റ് ഏഴ് വെള്ളിയാഴ്ച വരെ യുഎഇയുടെ ചില ഭാഗങ്ങളിൽ മഴക്ക് സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം (NCM) തിങ്കളാഴ്ച അറിയിച്ചു. വ്യത്യസ്ത തീവ്രതയുള്ള മഴ പെയ്‌തേക്കുമെന്നാണ് NCM മുന്നറിയിപ്പ്. ചില കിഴക്കൻ, തെക്കൻ പ്രദേശങ്ങളിൽ തിങ്കളാഴ്ച ഉച്ചക്ക് മഴ മേഘങ്ങൾ രൂപപ്പെട്ടേക്കാം. നേരിയതോ മിതമായതോ ആയ കാറ്റുമുണ്ടായേക്കും. ചിലപ്പോൾ കാറ്റ് ശക്തിയാർജിക്കുകയും ചെയ്യും. ചില പ്രദേശങ്ങളിൽ മണിക്കൂറിൽ 40 കിലോമീറ്റർ വേഗതയിൽ പൊടിക്കാറ്റ് വീശും.

അൽ മദാം, നസ്വ, മലീഹ എന്നിവയുടെ പടിഞ്ഞാറൻ പ്രദേശങ്ങൾ, തെക്കുകിഴക്കൻ ദുബൈയിലെ മർഖബ്, അൽ ഫഖ, മർഗം, അൽ ഐനിന് വടക്ക് ഭാഗത്തുള്ള സ്ഥലങ്ങൾ എന്നിവിടങ്ങളിൽ മഴമേഘങ്ങളുണ്ടാകാൻ സാധ്യതയുണ്ടെന്നാണ് എക്‌സ്-ലെ കാലാവസ്ഥാ നിരീക്ഷണ ചാനലായ സ്റ്റോം സെന്റർ അറിയിക്കുന്നത്.

NCMന്റെ അഞ്ച് ദിവസത്തെ ബുള്ളറ്റിൻ അനുസരിച്ച്, ചില കിഴക്കൻ, തെക്കൻ പ്രദേശങ്ങളിൽ ചൊവ്വാഴ്ചയും മഴ പെയ്യാൻ സാധ്യതയുണ്ട്. ബുധനാഴ്ച, കിഴക്കൻ, ഉൾനാടൻ പ്രദേശങ്ങളുടെ ചില ഭാഗങ്ങളിൽ മഴയും പ്രവചിക്കപ്പെടുന്നു.

വ്യാഴാഴ്ച കിഴക്കൻ, പടിഞ്ഞാറൻ പ്രദേശങ്ങളിൽ മഴമേഘങ്ങൾ രൂപപ്പെട്ടേക്കാം. വെള്ളിയാഴ്ചയോടെ കിഴക്കൻ, തെക്കൻ, പടിഞ്ഞാറൻ പ്രദേശങ്ങളിൽ മഴ പെയ്യാനുള്ള സാധ്യതയുണ്ടെന്നും അധികൃതർ പറയുന്നു.

അതേസമയം, മഴക്ക് സാധ്യതയുണ്ടെങ്കിലും പലയിടത്തും താപനില ഉയർന്ന നിലയിൽ തുടരും. തിങ്കളാഴ്ച ഉൾനാടൻ പ്രദേശങ്ങളിൽ പരമാവധി താപനില 45°C നും 50°C നും ഇടയിൽ എത്തിയേക്കും. അതേസമയം തീരദേശ, ദ്വീപ് പ്രദേശങ്ങളിൽ 42°C മുതൽ 47°C വരെ ഉയർന്ന താപനില രേഖപ്പെടുത്താം. പർവത താപനില 33°C മുതൽ 39°C വരെയാകുമെന്നാണ് പ്രതീക്ഷ.