റമദാനിൽ സ്വകാര്യ മേഖലയിലെ ജോലി സമയം യു.എ.ഇ മാനവ വിഭവശേഷി മന്ത്രാലയം പ്രഖ്യാപിച്ചു

ദുബൈ: റമദാനിൽ സ്വകാര്യ മേഖലയിലെ ജോലി സമയം യു.എ.ഇ മാനവ വിഭവശേഷി മന്ത്രാലയം പ്രഖ്യാപിച്ചു. മുൻ മാസങ്ങളെ അപേക്ഷിച്ച്​ ദിവസത്തിൽ രണ്ട്​ മണിക്കൂർ കുറവായിരിക്കും റമദാനിലെ ജോലി സമയം.

യു.എ.ഇയിൽ സാധാരണഗതിയിൽ സ്വകാര്യ മേഖലയിലെ ജോലി സമയം ദിവസം എട്ട്​ മണിക്കൂർ അല്ലെങ്കിൽ ആഴ്ചയിൽ 48 മണിക്കൂർ ആണ്​.​​ റമദാനിൽ ഇത്​ ദിവസം ആറ്​ മണിക്കൂർ, ആഴ്ചയിൽ 36 മണിക്കൂർ എന്ന നിലയിലേക്ക്​ ചുരുങ്ങും. ഇതിൽ കൂടുതൽ സമയം ജോലി ചെയ്താൽ ഓവർ ടൈം ആനുകൂല്യങ്ങൾ നൽകണം. സ്ഥാപനത്തിലെ ജോലിയുടെ സ്വഭാവം അനുസരിച്ച്​ വി​ദൂര ജോലി സംവിധാനം ഏർപെടുത്താം.

കഴിഞ്ഞ ദിവസം ഫെഡറൽ സർക്കാർ ജീവനക്കാരുടെ ജോലി സമയം പ്രഖ്യാപിച്ചിരുന്നു. തിങ്കൾ മുതൽ വ്യാഴം വരെ രാവിലെ ഒമ്പത്​ മുതൽ ഉച്ചക്ക്​ 2.30 വരെയാണ്​ സർക്കാർ മേഖലയിലെ ജോലി സമയം. വെള്ളിയാഴ്ച രാവിലെ ഒമ്പത്​ മുതൽ ഉച്ചക്ക്​ 12 വരെയാണ്​ ജോലി.