ദുബൈയിലെ പൊതുഗതാഗതം ഉപയോഗിച്ചവരുടെ എണ്ണത്തിൽ 35 ശതമാനം വർധന; ദിവസവും 17 ലക്ഷം യാത്രക്കാർ

ദുബൈ: കഴിഞ്ഞ വർഷം ദുബൈയിലെ പൊതുഗതാഗതം ഉപയോഗിച്ചവരുടെ എണ്ണത്തിൽ 35 ശതമാനം വർധനവ്​. ആർ.ടി.എ പുറത്തുവിട്ട കണക്കിലാണ്​ ഇക്കാര്യം വ്യക്​തമാക്കുന്നത്​. മെട്രോ, ട്രാം, ബസ്​, ടാക്സി എന്നിവ വഴി യാത്ര ചെയ്തവരുടെ കണക്കാണിത്​.

2022ൽ ആകെ 62.1 കോടി യാത്രികരാണ്​ പൊതുഗതാഗം ഉപയോഗപ്പെടുത്തിയത്​. 2021നെ അപേക്ഷിച്ച്​ 35 ശതമാനം വർധനവാണിത് ​. 2021ൽ ആകെ യാത്രക്കാർ 46.1 കോടിയും ദിവസ യാത്രക്കാർ 13 ലക്ഷവുമായിരുന്നു. ഏറ്റവും കൂടുതൽ യാത്രക്കാർ സഞ്ചരിച്ചത്​ മാർച്ചിലാണ്​. എക്സ്​പോ 2020യുടെ അവസാന മാസമായ മാർച്ചിൽ 6.2 കോടി യാത്രക്കാരാണ്​ പൊതുഗതാഗതം ഉപയോഗിച്ചത്​. മെട്രോ ഉപയോഗത്തിൽ മൂന്ന്​ ശതമാനവും ജലഗതാഗതം ഒരു ശതമാനവും വളർച്ച നേടി.

കഴിഞ്ഞ വർഷം ആകെ യാത്രയുടെ 36 ശതമാനവും മെട്രോ വഴിയായിരുന്നു. 2021ൽ ഇത്​ 33 ശതമാനമായിരുന്നു. 25 ശതമാനം പേർ ബസ്​ സർവീസ്​ ഉപയോഗപ്പെടുത്തിയപ്പോൾ ജലഗതാഗതം വഴി യാത്ര ചെയ്തത്​ രണ്ട്​ ശതമാനമാണ്​. അബ്ര, ഫെറി, വാട്ടർ ടാക്സി, വാട്ടർ ബസ്​ എന്നിവ ഇതിൽ ഉൾപെടുന്നു. മാർച്ച്​കഴിഞ്ഞാൽ ഏറ്റവും കൂടുതൽ യാത്രക്കാർ സഞ്ചരിച്ചത്​ ഡിസംബറിലാണ്​.

5.7 കോടി യാത്രക്കാരാണ്​ ഡിസംബറിൽ പൊതുഗതാഗം ഉപയോഗപ്പെടുത്തിയത്​. ഖത്തർ ലോകകപ്പാണ്​ ഈ മാസം ഇത്രയധികം യാത്രക്കാർ വർധിക്കാൻ കാരണം. മറ്റ്​ മാസങ്ങളിൽ ശരാശരി 4.6 കോടി- 5.6 കോടി യാത്രക്കാർ പൊതുഗതാഗതം ഉ​പയോഗിച്ചു. ടാക്സികളും ബസുകളും ഉൾപെട്ട പൊതുഗതാഗത വാഹനങ്ങൾ 2022ൽ 12.9 കോടി യാത്രകളാണ്​ നടത്തിയത്​.