'സാലിക്​' ഓഹരി വിൽപനക്ക് ​തുടക്കം; ലക്ഷ്യം 300കോടി ദിർഹം

ദുബൈ എമിറേറ്റിലെ റോഡ്​ ചുങ്കം സംവിധാനമായ 'സാലിക്​' ഓഹരി വിൽപന മുഖേന 300കോടി ദിർഹം സമാഹരിക്കും. കമ്പനിയുടെ 20 ശതമാനം ഇനീഷ്യൽ പബ്ലിക് ഓഫറിങിലൂടെ വിൽക്കുമെന്ന്​ കഴിഞ്ഞ ആഴ്ചയാണ്​ അധികൃതർ വ്യക്​​തമാക്കിയത്​. ചൊവ്വാഴ്ച മുതൽ ആരംഭിച്ച വിൽപനയിൽ ഒരു ഓഹരിക്ക് 2 ദിർഹമാണ്​ വില.

മൊത്തം 150കോടി ഓഹരികളാണ്​ വിൽപനക്ക്​ വെച്ചിരിക്കുന്നത്​. സെപ്​റ്റംബർ 13മുതൽ 20വരെയാണ്​ വിൽപന നടക്കുക. കമ്പനിയുടെ 80ശതമാനം സർക്കാർ നിയന്ത്രണത്തിൽ നിലനിർത്തും. എന്നാൽ സബ്‌സ്‌ക്രിപ്‌ഷൻ കാലയളവ് അവസാനിക്കുന്നതിന് മുമ്പ് വിൽപനക്കുവെച്ച ഓഹരികൾ വർധിപ്പിക്കാൻ സാലിക് കമ്പനി ഉടമകളായ ദുബൈ സർക്കാറിന്​ സാധിക്കും. വിൽപനയെ തുടർന്ന്​ സെപ്റ്റംബർ 29ന് 'സാലിക്' ദുബൈ ഫിനാൻഷ്യൽ മാർക്കറ്റിൽ ലിസ്റ്റ് ചെയ്യും.

ദുബൈയിലെ ഏറ്റവും വലിയ ബാങ്കായ എമിറേറ്റ്‌സ് എൻ.ബി.ഡി ആയിരിക്കും ഐ.പി.ഒയുടെ ലീഡ് സ്വീകരിക്കുന്ന ബാങ്ക്. അതിനിടെ യു.എ.ഇ സ്ട്രാറ്റജിക് ഇൻവെസ്റ്റ്‌മെന്‍റ്​ ഫണ്ട്, ദുബൈ ഹോൾഡിങ്​, ഷമാൽ ഹോൾഡിങ്​, അബുദാബി പെൻഷൻ ഫണ്ട് എന്നിവ കോർണർസ്​റ്റോൺ നിക്ഷേപകരാക്കി സാലിക്​ കരാർ ഒപ്പുവെച്ചിട്ടുണ്ട്​. നിശ്ചിത എണ്ണം ഓഹരികൾക്ക്​ മുൻകൂട്ടി നിക്ഷേപിക്കുന്നവരാണ്​ കോർണർസ്​റ്റോൺ നിക്ഷേപകർ. ഇവർ 60.6കോടി ദിർഹമിന്‍റെ ഓഹരികൾ വാങ്ങാനാണ്​ ധാരണ രൂപപ്പെടുത്തിയിരിക്കുന്നത്​.

മാർച്ചിൽ ദുബൈ ജല,വൈദ്യൂത വകുപ്പായ 'ദേവ' ഐ.പി.ഒയിലൂടെ 22.41 ബില്യൺ ദിർഹം ദുബൈ സമാഹരിച്ചിരുന്നു. 8.50ബി​ല്യ​ൺ ഷെ​യ​റു​ക​ളാണ്​ 'ദേവ' വിറ്റത്​. 'സാലികി'നും മികച്ച പ്രതികരണം ലഭിക്കുമെന്നാണ്​ പ്രതീക്ഷ.