ദുബൈയിൽ വൻകിട റോഡ്​ വികസന പദ്ധതിയുടെ ആദ്യഘട്ടം പൂർത്തിയായി

ദുബൈയിൽ വൻകിട റോഡ്​ വികസന പദ്ധതിയുടെ ആദ്യഘട്ടം പൂർത്തിയായി. ശൈഖ്​ റാശിദ്​ ബിൻ സഈദ്​ കോറിഡോറി​ന്റെ പ്രഥമഘട്ടമാണ്​ യാത്രക്കാർക്കായി തുറന്നത്​. പദ്ധതി പൂർത്തിയാകുന്നതോടെ ദുബൈ റാസൽ ഖോർ റോഡിലെ യാത്രാസമയം 20 മിനിറ്റിൽനിന്ന് ഏഴായി കുറയുമെന്നും അധികൃതർ വ്യക്തമാക്കി.

ബൂ കദ്​റ മുതൽ നാദ്​ അൽ ഹമർ വരെ നീളുന്നതാണ്​ പദ്ധതിയുടെ ആദ്യഘട്ടം. മൂന്ന്​ ലൈനുള്ളത്​ ഇവിടെ നാല്​ ലൈനുകളായാണ്​ വികസിപ്പിച്ചത്​. ഏതാണ്ട്​ നാലു കിലോമീറ്റർ ദൈർഘ്യത്തിലാണ്​ വികസനം. ദുബൈ ക്രീക്ക്​ ഹാർബറിലേക്കുള്ള എല്ലാ പാലങ്ങളും തുറന്നു. ഇതോടെ ക്രീക്ക്​ ഹാർബറിലേക്ക്​ കൂടുതൽ വാഹനങ്ങൾക്ക്​ എളുപ്പത്തിൽ എത്തിച്ചേരാനാകുമെന്ന്​ ആർ.ടി.എ അധികൃതർ വ്യക്​തമാക്കി. രണ്ടു ഘട്ട പദ്ധതി പൂർത്തീകരിക്കുന്നതോടെ വൻ വികസന കുതിപ്പിനാകും പ്രദേശം സാക്ഷ്യംവഹിക്കുക.

1730 മീറ്റർ വിസ്​തൃതിയിൽ മണിക്കൂറിൽ പതിനായിരത്തിലേറെ വാഹനങ്ങൾക്ക്​ കടന്നു പോകാൻ കഴിയുന്ന പദ്ധതിയാണിത്​. പദ്ധതി യാഥാർഥ്യമാകുമ്പോള്‍ ശൈഖ്​ മുഹമ്മദ്​ ബിൻ സായിദ്​ റോഡ്​, ബൂ കദ്​റ ജങ്​ഷൻ എന്നിവ മുഖേനയുള്ള യാത്രാ സമയം ഇരുപത്​ മിനിറ്റിൽ നിന്ന്​ 7 മിനിറ്റായി ചുരുങ്ങും. വിപുലമായ തോതിലുള്ള റോഡ്​ വികസന പദ്ധതികളാണ്​ ദുബൈയിൽ പൂർത്തിയാകുന്നതെന്നും ആർ.ടി.എ ചെയർമാൻ മതാർ അൽ തായർ പറഞ്ഞു.