നയത​ന്ത്ര ചർച്ച വേണം; പുടിനുമായി ചർച്ച നടത്തി യു.എ.ഇ പ്രസിഡൻറ്

യു.എ.ഇ പ്രസിഡൻറ്​ ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാൻ റഷ്യൻ പ്രസിഡൻറ്​ വ്ളാഡ്മിർ പുടിനുമായി ചർച്ച നടത്തി. റഷ്യയിലെ സെൻറ്​ പീറ്റേഴ്​സ്​ ബർഗിലായിരുന്നു കൂടിക്കാഴ്​ച. സംഘർഷത്തിന്​ നയത​ന്ത്രവഴികളിലൂടെയുള്ള പരിഹാരം തന്നെയാണ്​ അഭികാമ്യമെന്ന സന്ദേശം​ യു.എ.ഇ പ്രസിഡൻറ്,​ റഷ്യൻ പ്രസിഡൻറിനെ ഓർമിപ്പിച്ചു.

യുക്രൈൻ യുദ്ധം ഏറെ സങ്കീർണമായ ഒരു ഘട്ടത്തിലാണ്​ യു.എ.ഇ പ്രസിഡൻറും റഷ്യൻ പ്രസിഡൻറും തമ്മിൽ ചർച്ച നടന്നത്​. ആഗോള സമാധാനമാണ്​ പ്രധാനമെന്നും അതിന്​ നയതന്ത്ര പ്രശ്​ന പരിഹാരമാണ്​ വേണ്ടതെന്നും കൂടിക്കാഴ്​ച്ചാ വേളയിൽ ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാൻ പുടിനെ അറിയിച്ചു. ലോകം അഭിമുഖീകരിക്കുന്ന ഗുരുതര സമസ്യകൾ സംബന്ധിച്ച്​​ ഇരു നേതാക്കളും നിലപാടുകൾ പങ്കുവെച്ചു. പ്രാദേശികവും അന്തർദേശീയവുമായ നിരവധി വിഷയങ്ങൾ ചർച്ചയായി. തുറന്ന ചർച്ചകളിലൂടെ മാ​ത്രമേ സംഘർഷങ്ങൾ പരിഹരിക്കാൻ സാധിക്കൂ എന്ന യുഎ.ഇയുടെ പ്രഖ്യാപിത നിലപാട്​ പുടിനു മുമ്പാകെ യു.എ.ഇ പ്രസിഡൻറ്​ പങ്കുവെച്ചു.

സമാധാനപൂർണമായ രാഷ്​ട്രീയ സാഹചര്യം രൂപ​പ്പെടുത്താൻ തങ്ങളുടെ ഭാഗത്തുനിന്നുള്ള എല്ലാ സഹകരണവും യു.എ.ഇ പ്രസിഡൻറ്​ പുടിന്​ ഉറപ്പു നൽകി. ഉഭയകക്ഷി ബന്​ധം കൂടുതൽ മെച്ചപ്പെടുത്താൻ ആവശ്യമായ എല്ലാ നടപടികളും സ്വീകരിക്കാൻ റഷ്യയും യു.എ.ഇയും തമ്മിൽ ധാരണയായി.