അഞ്ച് പതിറ്റാണ്ടിനിടെ ആദ്യ വനിതാ മേധാവി; യുഎൻ ടൂറിസം സെക്രട്ടറി ജനറലായി യു.എ.ഇയുടെ ശൈഖ അൽ നൊവൈസ്

ദുബൈ: ഐക്യരാഷ്ട്രസഭ ടൂറിസം സ്പെഷ്യലൈസ്ഡ് ഏജൻസിയുടെ അടുത്ത സെക്രട്ടറി ജനറലായി യു.എ.ഇയിലെ ശൈഖ അൽ നൊവൈസ്. 50 വർഷത്തെ ചരിത്രത്തിൽ സംഘടനയെ നയിക്കുന്ന ആദ്യ വനിതയാകും ഇവർ.

മെയ് മാസത്തിൽ തിരഞ്ഞെടുക്കപ്പെട്ട അവരുടെ നിയമനം റിയാദിൽ നടന്ന 26-ാമത് യുഎൻ ടൂറിസം ജനറൽ അസംബ്ലിയാണ് അംഗീകരിച്ചത്. 160-ലധികം രാജ്യങ്ങൾ പങ്കെടുത്ത വോട്ടെടുപ്പിൽ ഭൂരിപക്ഷത്തോടെയായിരുന്നു സ്ഥിരീകരണം. 2026-2029 കാലയളവിൽ ആഗോള ടൂറിസം പ്രോത്സാഹിപ്പിക്കുന്നതിന് അവർ സംഘടനയെ നയിക്കും.

യുഎൻ അംഗങ്ങൾക്ക് നന്ദി അറിയിച്ച അൽ നൊവൈസ് ഭാവി പദ്ധതികളെക്കുറിച്ച് സംസാരിച്ചു. യുവാക്കൾ, സ്ത്രീകൾ, പ്രാദേശികസമൂഹങ്ങൾ എന്നിവരെ ഉൾക്കൊള്ളിച്ചായിരിക്കും പദ്ധതികളെന്നും അവർ വ്യക്തമാക്കി. അൽ നൊവൈസിനെ തെരഞ്ഞെടുത്തത് ആ​ഗോള ടൂറിസം മേഖലയ്ക്കും യുഎഇക്കും പ്രധാന നാഴികക്കല്ലാകുമെന്ന് യുഎഇ ടൂറിസം മന്ത്രി പ്രതികരിച്ചു.