ഒട്ടകങ്ങൾ വരിവരിയായ്..; സായിദ് ​ഗ്രാന്റ് പ്രൈസ് ഒട്ടകയോട്ട മത്സരങ്ങൾക്ക് ഇന്ന് തുടക്കം

ദുബൈ: അബൂദബിയിലെ അൽ വത്ബ ഒട്ടകപ്പന്തയ മൈതാനത്ത് സായിദ് ​ഗ്രാന്റ് പ്രൈസ് ഒട്ടകപ്പന്തയ മത്സരങ്ങൾക്ക് ഇന്ന് തുടക്കമാകും. ഡിസംബർ 1 വരെ നീളുന്ന മത്സരത്തിൽ ജിസിസി രാജ്യങ്ങളിൽ നിന്നുള്ള ആയിരക്കണക്കിന് ഒട്ടകങ്ങൾ പങ്കെടുക്കും. പങ്കെടുക്കുന്ന ഒട്ടകങ്ങൾക്ക് മത്സര ദിവസങ്ങളിൽ 36 ചിഹ്നങ്ങൾ സുപ്രീം സംഘാടക സമിതി അനുവദിച്ചു. ഈ വർഷത്തെ മത്സരത്തിൽ ആകെ 234 റൗണ്ടുകളാണുള്ളത്.

15 മുതൽ 20 വയസ്സ് വരെയുള്ള പ്രായക്കാർക്കുള്ള പൈതൃക മത്സരത്തിന്റെ 15 റൗണ്ടുകളും അവാർഡിൽ ഉൾപ്പെടും. ഓരോ റൗണ്ടിലെയും ഒന്നാം സ്ഥാനക്കാർക്ക് 1 ലക്ഷം ദിർഹം വരെ സമ്മാനം ലഭിക്കും. ഡിസംബർ ആദ്യം ഒട്ടക ഉടമകൾക്കുള്ള ഏറ്റവും പ്രധാനപ്പെട്ട സമ്മാന റൗണ്ടുകളോടെയാണ് മത്സരം സമാപിക്കുന്നത്. യുവ ഒട്ടകങ്ങൾക്കായുള്ള പ്രധാന മത്സരത്തിലെ ചാമ്പ്യന് ഒരു റൈഫിളും ഒന്നര ദശലക്ഷം ദിർഹവും ലഭിക്കും.