മാതാപിതാക്കളെക്കുറിച്ചുള്ള ഇക്കാര്യങ്ങൾ കുട്ടികൾ ജീവിതകാലം മുഴുവൻ ഓർക്കും; തെറ്റുകൾ തിരുത്താം

കുട്ടിക്കാലത്ത് നടന്ന എല്ലാം ഓർത്തുവെക്കുന്നവരല്ല നമ്മൾ. കളിപ്പാട്ടങ്ങളോ, കഴിച്ച ഓരോ ഭക്ഷണവുമോ, അല്ലെങ്കിൽ വീട്ടിൽ ചിലവഴിച്ച സാധാരണമായ വൈകുന്നേരങ്ങളോ ഒന്നും ഓർത്തു വെക്കാറില്ല. എന്നാൽ മായാതെ അവശേഷിക്കുന്നത് അതിലും നിശബ്ദവും എന്നാൽ വളരെ ശക്തവുമായ ചില കാര്യങ്ങളാണെന്നാണ് പഠനങ്ങൾ പറയുന്നു. ആ വീടിന്റെ വൈകാരികമായ അന്തരീക്ഷം, അവരോട് സ്നേഹം പ്രകടിപ്പിച്ചിരുന്ന രീതി, വീട്ടിലെ തർക്കങ്ങളും പ്രശ്നങ്ങളും പരിഹരിച്ചിരുന്ന വഴി, കൂടാതെ മറ്റാരുടെയും ശ്രദ്ധയില്ലാത്തപ്പോൾ അവരുടെ മാതാപിതാക്കൾ യഥാർഥത്തിൽ എങ്ങനെയുള്ള മനുഷ്യരായിരുന്നു എന്നത് എന്നിവയൊക്കെയാണത്. വർഷങ്ങൾക്കുശേഷം, മാതാപിതാക്കൾ കാട്ടിയ വലിയ പ്രകടനങ്ങളല്ല കുട്ടികൾ ഓർക്കുക. തങ്ങൾ എത്രത്തോളം സുരക്ഷിതരാണെന്നും, പ്രിയപ്പെട്ടവരാണെന്നും, പരിഗണിക്കപ്പെടുന്നവരാണെന്നും തങ്ങളെ ബോധ്യപ്പെടുത്തിയ ചെറിയ നിമിഷങ്ങളാണ്. ഈ ഓർമ്മകൾ അത്ര പെട്ടെന്നൊന്നും മാഞ്ഞുപോകില്ല, കാരണം അവ ഒരു കുട്ടിയുടെ ഉള്ളിൽ വിശ്വാസത്തിന്റെയും, സ്നേഹത്തിന്റെയും, ആത്മാഭിമാനത്തിന്റെയും ആഴത്തിലുള്ള അടിത്തറയായി ‌മാറിക്കഴിഞ്ഞിരിക്കും. മാതാപിതാക്കളെക്കുറിച്ച് കുട്ടികൾ ജീവിതകാലം മുഴുവൻ മനസിൽ സൂക്ഷിക്കുന്ന ഏഴ് കാര്യങ്ങൾ താഴെ പറയുന്നവയാണ്.

1. സുരക്ഷിതത്വബോധം നൽകിയ നിമിഷങ്ങൾ

വീട്ടിൽ തങ്ങൾക്ക് എത്രത്തോളം സുരക്ഷിതത്വമുണ്ടായിരുന്നുവെന്ന് കുട്ടികൾ എപ്പോഴും ഓർക്കും. കൊടുങ്കാറ്റുള്ള രാത്രികളിലോ, ഭയം തോന്നിയപ്പോഴോ മാതാപിതാക്കൾ തങ്ങളെ കെട്ടിപ്പിടിച്ച് ആശ്വസിപ്പിച്ചതും കൂടെയുണ്ടായിരുന്നതുമായ നിമിഷങ്ങൾ അവർ ഒരിക്കലും മറക്കില്ല.

2. നിങ്ങൾ അവരെ ശ്രദ്ധയോടെ കേട്ടിരുന്ന രീതി

നിങ്ങളുടെ ഫോണോ മറ്റ് ജോലികളോ മാറ്റിവെച്ച്, അവരുടെ കുഞ്ഞു വിശേഷങ്ങളും സങ്കടങ്ങളും പൂർണ്ണ ശ്രദ്ധയോടെ കേട്ടിരുന്ന നിമിഷങ്ങൾ അവരുടെ മനസിലുണ്ടാകും. തങ്ങളുടെ വാക്കുകൾക്ക് മാതാപിതാക്കൾ വില നൽകിയിരുന്നു എന്ന ചിന്ത അവരിൽ ആത്മവിശ്വാസം വളർത്തുന്നു.

3. മാതാപിതാക്കൾ പരസ്പരം പെരുമാറിയ രീതി

മാതാപിതാക്കൾ തമ്മിലുള്ള ബന്ധവും അവർ പരസ്പരം എങ്ങനെ സംസാരിച്ചിരുന്നു എന്നതും കുട്ടികൾ എപ്പോഴും നിരീക്ഷിക്കുന്നുണ്ട്. വീട്ടിലെ തർക്കങ്ങൾ സ്നേഹത്തോടെയും ബഹുമാനത്തോടെയും പരിഹരിക്കുന്നത് കാണുമ്പോൾ, ഭാവിയിൽ മറ്റുള്ളവരോട് എങ്ങനെ പെരുമാറണമെന്ന് അവർ പഠിക്കുന്നു.

4. പ്രോത്സാഹനവും വിമർശനങ്ങളും

തനിക്ക് നിന്നിൽ വിശ്വാസമുണ്ട് എന്ന് മാതാപിതാക്കൾ പറഞ്ഞ വാക്കുകൾ അവർക്ക് ജീവിതകാലം മുഴുവൻ കരുത്താകും. അതേസമയം തന്നെ, ദേഷ്യത്തിൽ അവരെ വേദനിപ്പിക്കാൻ പറഞ്ഞ കഠിനമായ വാക്കുകളും അവരുടെ മനസ്സിൽ ആഴത്തിൽ പതിയാൻ സാധ്യതയുണ്ട്.

5. കുടുംബ പാരമ്പര്യങ്ങളും ഒത്തുകൂടലുകളും

വലിയ ആർഭാടങ്ങളല്ല, മറിച്ച് എല്ലാ ഞായറാഴ്ചകളിലുമുള്ള ഒരുമിച്ചുള്ള ഭക്ഷണം, രാത്രിയിലെ കഥ പറയൽ, അല്ലെങ്കിൽ ജന്മദിനങ്ങൾ ലളിതമായി ആഘോഷിക്കുന്നത് പോലുള്ള ചെറിയ കുടുംബ പാരമ്പര്യങ്ങൾ കുട്ടികളുടെ ഓർമ്മകളിൽ എന്നും മനോഹരമായി നിലനിൽക്കും.

6. നിങ്ങൾ മറ്റുള്ളവരോട് പെരുമാറിയത്

മാതാപിതാക്കൾ ഒരു വഴിപോക്കനോടോ, ഹോട്ടലിലെ ജീവനക്കാരോടോ അല്ലെങ്കിൽ മറ്റുള്ളവരോടോ കാരുണ്യത്തോടെയും ബഹുമാനത്തോടെയും പെരുമാറുന്നത് കാണുമ്പോൾ കുട്ടികൾ അത് മനസ്സിൽ കുറിച്ചിടുന്നു. ഇത് അവരുടെ ലോകവീക്ഷണത്തെ രൂപപ്പെടുത്തും.

7. സമ്മർദ്ദഘട്ടങ്ങളിൽ നിങ്ങൾ എങ്ങനെ പ്രതികരിച്ചു

ജീവിതത്തിൽ പ്രതിസന്ധികളോ പരാജയങ്ങളോ ഉണ്ടായപ്പോൾ മാതാപിതാക്കൾ അതിനെ എങ്ങനെ നേരിട്ടു എന്ന് കുട്ടികൾ ഓർക്കും. മാതാപിതാക്കൾ തളരാതെ മുന്നോട്ട് പോകുന്നത് കാണുമ്പോൾ, പ്രതികൂല സാഹചര്യങ്ങളെ ധീരമായി നേരിടാനുള്ള പാഠമാണ് അവർക്ക് ലഭിക്കുന്നത്.