ബോളിവുഡിലെ ഏറ്റവും ഊർജസ്വലനായ നടന്മാരിലൊരാളാണ് അനുപം ഖേർ. തന്റെ മാനസികാരോ​ഗ്യത്തെക്കുറിച്ച് താരം നടത്തിയ വെളിപ്പെടുത്തലാണ് ഇപ്പോൾ ചർച്ചയാകുന്നത്. ലോകമെമ്പാടുമുള്ള ദശലക്ഷക്കണക്കിന് ആളുകളെ ബാധിക്കുന്ന 'ബൈപോളാർ ഡിസോർഡർ' (bipolar disorder) എന്ന മാനസികാരോഗ്യ പ്രശ്നത്തിലൂടെയാണ് താൻ കടന്നുപോകുന്നതെന്ന അദ്ദേഹത്തിന്റെ വെളിപ്പെടുത്തൽ വലിയ ചർച്ചകൾക്കാണ് വഴിവെച്ചിരിക്കുന്നത്.

കണ്ണുവേദനയിൽ നിന്ന് സൈക്യാട്രിസ്റ്റിലേക്ക്

2011ൽ തന്റെ ആദ്യത്തെ മോട്ടിവേഷണൽ പുസ്തകമായ 'ദ ബെസ്റ്റ് തിങ് എബൗട്ട് യു ഈസ് യു' പുറത്തിറങ്ങുന്ന സമയത്താണ് ഈ രോഗാവസ്ഥയുടെ ലക്ഷണങ്ങൾ അനുപം ഖേറിൽ കണ്ടുതുടങ്ങുന്നത്. തുടർച്ചയായ ഉറക്കമില്ലായ്മയായിരുന്നു പ്രധാന പ്രശ്നം. ഉറക്കക്കുറവ് അദ്ദേഹത്തിന്റെ ശാരീരികാരോഗ്യത്തെയും സാരമായി ബാധിച്ചു. രാവിലെ എഴുന്നേൽക്കുമ്പോൾ ചെറിയ വെളിച്ചം പോലും കണ്ണുകളിൽ അസഹനീയമായ വേദന സൃഷ്ടിക്കുന്ന അവസ്ഥയിലേക്ക് കാര്യങ്ങളെത്തി.

കണ്ണിലെ അസ്വസ്ഥത മാറ്റാൻ ഐ ഡ്രോപ്സ് ലഭിക്കുമെന്ന പ്രതീക്ഷയിൽ ഒരു നേത്രരോഗവിദഗ്ധനെ സമീപിച്ചപ്പോഴാണ് അപ്രതീക്ഷിത സംഭവങ്ങൾ ഉണ്ടാകുന്നത്. അദ്ദേഹത്തെ വിശദമായി പരിശോധിച്ച ഡോക്ടർ ഉടൻ തന്നെ ഒരു സൈക്യാട്രിസ്റ്റിനെ കാണാൻ ആവശ്യപ്പെടുകയായിരുന്നു. എപ്പോഴും പോസിറ്റീവായി ചിന്തിക്കുന്ന താൻ എന്തിനാണ് സൈക്യാട്രിസ്റ്റിനെ കാണുന്നതെന്ന് ഓർത്ത് അദ്ദേഹത്തിന് ആദ്യം ചിരിയാണ് വന്നത്. എന്നാൽ ഡോക്ടർ തന്റെ നിർദേശത്തിൽ ഉറച്ചുനിന്നു. ആശുപത്രിയിലെത്തിയാൽ ഉണ്ടാകാൻ സാധ്യതയുള്ള ആൾക്കൂട്ടത്തെയും ഗോസിപ്പുകളെയും ഒഴിവാക്കാൻ ഡോക്ടർ മുൻകൈയെടുത്ത് ഒരു സൈക്യാട്രിസ്റ്റിനെ വീട്ടിലെത്തിച്ച് പരിശോധന നടത്തുകയായിരുന്നു.

വിശദമായ പരിശോധനകൾക്കൊടുവിൽ അനുപം ഖേറിന് ബൈപോളാർ ഡിസോർഡർ അഥവാ 'മാനിക് ഡിപ്രഷൻ' ആണെന്ന് ഡോക്ടർ സ്ഥിരീകരിച്ചു. എന്നാൽ ഈ രോഗവിവരം മറച്ചുവെക്കാൻ അദ്ദേഹം തയാറായില്ല. പകരം ഈ യാഥാർഥ്യത്തെ ഉൾക്കൊള്ളാനും, കൃത്യമായ ചികിത്സ തേടാനും, മാനസികാരോഗ്യത്തെക്കുറിച്ചുള്ള ബോധവൽക്കരണത്തിനായി പ്രവർത്തിക്കാനുമാണ് അദ്ദേഹം തീരുമാനിച്ചത്.

എന്താണ് ബൈപോളാർ ഡിസോർഡർ?

പഴയകാലങ്ങളിൽ 'മാനിക് ഡിപ്രഷൻ' എന്ന് വിളിച്ചിരുന്ന രോഗാവസ്ഥയാണ് ഇന്ന് ബൈപോളാർ ഡിസോർഡർ എന്ന് അറിയപ്പെടുന്നത്. ഒരാളുടെ മാനസികാവസ്ഥ, ഊർജം, ഉറക്കം, പ്രവർത്തനക്ഷമത എന്നിവയിൽ അസാധാരണമായ മാറ്റങ്ങൾ ഉണ്ടാകുന്ന അവസ്ഥയാണിത്. സാധാരണയായി എല്ലാവർക്കും ഉണ്ടാകുന്ന മൂഡ് സ്വിങ്സുകളിൽ നിന്ന് വ്യത്യസ്തമായി, വ്യക്തിയുടെ ദൈനംദിന ജീവിതത്തെയും ബന്ധങ്ങളെയും ജോലിയെയും ഇത് സാരമായി ബാധിക്കും.

പ്രധാനമായും മൂന്ന് തരത്തിലാണ് ഈ രോഗാവസ്ഥ കാണപ്പെടുന്നത്:

• ബൈപോളാർ 1 (Bipolar I): കടുത്ത മാനിയ ലക്ഷണങ്ങൾ കാണിക്കുന്ന അവസ്ഥ. ഇത് ഒരാഴ്ചയിലധികം നീണ്ടുനിൽക്കുകയും, ചിലപ്പോൾ രോഗിക്ക് ആശുപത്രിവാസം തന്നെ ആവശ്യമായി വരികയും ചെയ്യാം.
• ബൈപോളാർ 2 (Bipolar II): കടുത്ത വിഷാദവും അതിനൊപ്പം തീവ്രത കുറഞ്ഞ മാനിയയും മാറിമാറി വരുന്ന അവസ്ഥ.
• സൈക്ലോത്തൈമിക് ഡിസോർഡർ (Cyclothymic disorder): കുറഞ്ഞത് രണ്ട് വർഷത്തോളമെങ്കിലും നീണ്ടുനിൽക്കുന്ന, എന്നാൽ തീവ്രത കുറഞ്ഞ മാനിയ, വിഷാദ ലക്ഷണങ്ങൾ കാണിക്കുന്ന അവസ്ഥയാണിത്.

പ്രധാന ലക്ഷണങ്ങളും കാരണങ്ങളും

ബൈപോളാർ ഡിസോർഡറിന്റെ ഏറ്റവും പ്രധാനപ്പെട്ട ലക്ഷണങ്ങളിലൊന്നാണ് ഉറക്കക്കുറവ്. സാധാരണ ഉറക്കമില്ലായ്മയിൽ ഒരാൾക്ക് വല്ലാത്ത ക്ഷീണം അനുഭവപ്പെടുമ്പോൾ, ബൈപോളാർ ഉള്ളവരിൽ ഉറക്കം കുറഞ്ഞാലും അസാധാരണമായ ഉന്മേഷമായിരിക്കും അനുഭവപ്പെടുക.

മാനിയ/ഹൈപ്പോമാനിയ ലക്ഷണങ്ങൾ: അസാധാരണമായ ഊർജം, അമിതമായ ആവേശം, വിശ്രമമില്ലായ്മ, അമിതമായി സംസാരിക്കുക, ചിന്തകളിൽ വലിയ ആശയങ്ങൾ വരിക, എടുത്തുചാട്ടം, പെട്ടെന്ന് ദേഷ്യം വരിക എന്നിവയാണ് ലക്ഷണങ്ങൾ.

• വിഷാദ ലക്ഷണങ്ങൾ: ഇതിന് വിപരീതമായി കടുത്ത വിഷാദം, ഒന്നിനോടും താല്പര്യമില്ലായ്മ, ഊർജമില്ലായ്മ, ദൈനംദിന കാര്യങ്ങൾ ചെയ്യാൻ മടി എന്നിവയും അനുഭവപ്പെടാം.
• ജനിതക കാരണങ്ങൾ, കടുത്ത മാനസിക സമ്മർദം, തലച്ചോറിലുണ്ടാകുന്ന രാസവ്യതിയാനങ്ങൾ, ലഹരിവസ്തുക്കളുടെ ഉപയോഗം എന്നിവ ഇത്തരം എപ്പിസോഡുകളെ പെട്ടെന്ന് പ്രകോപിപ്പിച്ചേക്കാം. കൃത്യമായ ചികിത്സ ലഭിച്ചില്ലെങ്കിൽ ഇത് വ്യക്തിയുടെ ജോലിയെയും സാമ്പത്തിക നിലയെയും ബന്ധങ്ങളെയും തകർക്കുകയും, ചിലപ്പോൾ ആത്മഹത്യാ പ്രവണതയിലേക്ക് നയിക്കുകയും ചെയ്തേക്കാം.

എങ്കിലും, കൃത്യമായ മരുന്നുകൾ, സൈക്കോതെറാപ്പി, ശരിയായ ഉറക്കം, ആരോഗ്യകരമായ ജീവിതശൈലി എന്നിവയിലൂടെ ഈ രോഗാവസ്ഥയെ പൂർണമായും നിയന്ത്രിച്ച് സാധാരണ ജീവിതം നയിക്കാൻ സാധിക്കുമെന്ന് വിദഗ്ധർ വ്യക്തമാക്കുന്നു.

(ഈ ലേഖനം പൊതുവായ വിവരങ്ങൾ നൽകാൻ മാത്രമുള്ളതാണ്. മാനസികാരോഗ്യവുമായി ബന്ധപ്പെട്ട പ്രശ്നങ്ങൾക്ക് എപ്പോഴും ഒരു സൈക്യാട്രിസ്റ്റിനെയോ സൈക്കോളജിസ്റ്റിനെയോ നേരിട്ട് കണ്ട് ഉപദേശം തേടുക.)