നമ്മുടെ അടുക്കളകളിൽ തികച്ചും സാധാരണമായി കാണുന്ന, എന്നാൽ പലരും അതിന്റെ യഥാർഥ ഗുണം തിരിച്ചറിയാതെ പോകുന്ന ഒരു സൂപ്പർ ഫുഡാണ് മുരിങ്ങ. സാമ്പാറിലും കറികളിലുമൊക്കെ നാം പതിവായി ഉപയോഗിക്കാറുള്ള ഈ നാടൻ പച്ചക്കറി, മുടിയുടെ ആരോഗ്യത്തിന് എത്രത്തോളം സഹായിക്കുമെന്ന് നിങ്ങൾക്ക് അറിയാമോ? തിളക്കമില്ലാത്തതും കൊഴിയുന്നതുമായ മുടിയെ ഉള്ളുള്ളതും കരുത്തുറ്റതുമാക്കി മാറ്റാൻ ഈ 'നാടൻ സൂപ്പർഫുഡിനെ' എങ്ങനെ ഉപയോഗിക്കാമെന്ന് നോക്കാം.

മുരിങ്ങയെ 'മിറക്കിൾ ട്രീ' എന്ന് വിളിക്കുന്നത് എന്തുകൊണ്ട്?

മുരിങ്ങയെ ഒരു അത്ഭുത വൃക്ഷം എന്ന് വിളിക്കുന്നതിന് കൃത്യമായ കാരണമുണ്ട്. ഇതിന്റെ ഇലകളും കായകളും മുതൽ വിത്തുകൾ വരെ നിങ്ങളുടെ മുടിക്ക് ആവശ്യമായ വിറ്റാമിനുകളാലും ധാതുക്കളാലും സമ്പന്നമാണ്. മുടിവളർച്ചയ്ക്ക് അത്യന്താപേക്ഷിതമായ വിറ്റാമിൻ എ, വിറ്റാമിൻ സി, സിങ്ക്, ഇരുമ്പ് എന്നിവ ഇതിൽ ധാരാളമായി അടങ്ങിയിരിക്കുന്നു.

• വിറ്റാമിൻ എ: തലയോട്ടിയിലെ ഈർപ്പം നിലനിർത്താനും താരൻ, വരൾച്ച എന്നിവ തടയാനും സഹായിക്കുന്നു.
• വിറ്റാമിൻ സി: മുടിയിഴകൾക്ക് കരുത്ത് നൽകുന്ന കൊളാജന്റെ ഉത്പാദനം വർധിപ്പിക്കുന്നു.
• സിങ്കും ഇരുമ്പും: തലയോട്ടിയിലേക്കുള്ള രക്തചംക്രമണം മെച്ചപ്പെടുത്തുകയും മുടിയുടെ വേരുകൾക്ക് ആവശ്യമായ പോഷകങ്ങൾ ഉറപ്പാക്കുകയും ചെയ്യുന്നു.

ദൈനംദിന ഉപയോഗത്തിന് മുരിങ്ങയില പൊടി

തിരക്കേറിയ ജീവിതശൈലിയുള്ളവർക്ക് ഏറ്റവും എളുപ്പത്തിൽ ഉപയോഗിക്കാൻ കഴിയുന്ന ഒന്നാണ് മുരിങ്ങയില പൊടി.രാവിലത്തെ സ്മൂത്തിയിലോ, കരിക്കിൻ വെള്ളത്തിലോ, അല്ലെങ്കിൽ ഇളം ചൂടുവെള്ളത്തിൽ അല്പം തേൻ ചേർത്തോ ഒരു ടീസ്പൂൺ മുരിങ്ങയില പൊടി ഉപയോഗിക്കാം.

മുടിയുടെ പ്രധാന പ്രോട്ടീനായ കെരാറ്റിൻ നിർമിക്കാൻ ആവശ്യമായ അമിനോ ആസിഡുകളും പ്ലാന്റ് ബേസ്ഡ് പ്രോട്ടീനും ഇതിൽ ധാരാളമുണ്ട്. ഇത് സ്ഥിരമായി കഴിക്കുന്നത് മുടികൊഴിച്ചിൽ കുറയ്ക്കാനും മുടിക്ക് കട്ടിയും തിളക്കവും വർധിപ്പിക്കാനും സഹായിക്കും.

മുടിക്ക് ഉന്മേഷം നൽകാൻ മുരിങ്ങ ജ്യൂസ്

കൂടുതൽ ഫ്രഷ് ആയ ഒരു രീതിയാണ് നിങ്ങൾ ആഗ്രഹിക്കുന്നതെങ്കിൽ മുരിങ്ങ ജ്യൂസ് തിരഞ്ഞെടുക്കാം. ശുദ്ധമായ മുരിങ്ങയില വെള്ളത്തിലോ അല്പം നാരങ്ങാനീരോ തേനോ ചേർത്ത് അടിച്ചെടുക്കാം. രാവിലെ വെറും വയറ്റിൽ 30-50 മില്ലിലിറ്റർ മുരിങ്ങ ജ്യൂസ് കുടിക്കുന്നത് പോഷകങ്ങളെ വേഗത്തിൽ ആഗിരണം ചെയ്യാൻ സഹായിക്കും.

ഇതിനുപുറമെ വെളിച്ചെണ്ണയോ ആവണക്കെണ്ണയോ ചേർത്ത് മുരിങ്ങ ജ്യൂസ് നേരിട്ട് തലയോട്ടിയിൽ പുരട്ടുന്നതും വളരെ നല്ലതാണ്. 30 മിനിറ്റിനുശേഷം വീര്യം കുറഞ്ഞ ഷാംപൂ ഉപയോഗിച്ച് കഴുകിക്കളയാം. ഇത് താരൻ അകറ്റാനും വേരുകൾക്ക് ബലം നൽകാനും സഹായിക്കുന്ന മികച്ചൊരു ഹെയർ മാസ്ക് ആണ്.

ആയുർവേദവും മുരിങ്ങയും

മുരിങ്ങ ഒരു ഇൻസ്റ്റഗ്രാം ട്രെൻഡായി മാറുന്നതിന് വളരെ മുമ്പു ത.ന്നെ നമ്മുടെ മുത്തശ്ശിമാർ മുടി വളരാനായി ഈ വിദ്യ ഉപയോഗിച്ചിരുന്നു. മുരിങ്ങയിലയും ചെമ്പരത്തിയും ചേർത്ത് അരച്ച് തലയിൽ തേക്കുന്നത് മുടി തഴച്ചുവളരാൻ പണ്ടുമുതലേ ഉപയോഗിക്കുന്നൊരു രീതിയാണ്. ശരീരത്തിലെ അമിതമായ ചൂട് കുറയ്ക്കാനും അതുവഴി മുടികൊഴിച്ചിൽ തടയാനും മുരിങ്ങയ്ക്ക് കഴിയും. കൂടാതെ, കറികളിൽ ഉപയോഗിക്കുന്ന മുരിങ്ങക്കായ ഒരിക്കലും മാറ്റിവെക്കരുത്; ഇത് രക്തചംക്രമണം മെച്ചപ്പെടുത്താൻ ഏറെ സഹായിക്കും.

ഏറ്റവും മികച്ച ഫലം ലഭിക്കാൻ ആഴ്ചയിൽ അഞ്ച് ദിവസം മുരിങ്ങയില പൊടിയും രണ്ട് ദിവസം ഡീപ് ക്ലെൻസിങ്ങിനായി മുരിങ്ങ ജ്യൂസും എന്ന രീതിയിൽ ഉപയോഗിക്കാം. ഈ രീതികൾ കൃത്യമായി പിന്തുടർന്നാൽ ആറ് മുതൽ എട്ട് ആഴ്ചകൾക്കുള്ളിൽ മുടികൊഴിച്ചിൽ മാറി പുതിയ മുടി വളരുന്നത് നിങ്ങൾക്ക് നേരിട്ട് കണ്ടറിയാം!

(ഈ ലേഖനം പൊതുവായ വിവരങ്ങൾ നൽകാൻ മാത്രമുള്ളതാണ്. പുതിയ ഡയറ്റുകൾ ആരംഭിക്കുന്നതിന് മുമ്പ്, പ്രത്യേകിച്ചും മറ്റ് ആരോഗ്യപ്രശ്നങ്ങളുള്ളവർ ഒരു ഡോക്ടറുടെയോ ഡയറ്റീഷ്യന്റെയോ ഉപദേശം തേടേണ്ടതാണ്.)