ലൈംഗികാതിക്രമം ഗുരുതര കുറ്റം; സഭ നിയമം പരിഷ്​കരിച്ച്​ മാർപാപ്പ

പുരോഹിതന്മാരുടെ ലൈംഗികാതിക്രമം​ ​ഗുരുതര കുറ്റമാക്കി മാറ്റി ഫ്രാൻസിസ്​ മാർപാപ്പ സഭ നിയമം പരിഷ്​കരിച്ചു. പുരോഹിതന്മാർക്കുപുറമെ പള്ളികളിൽ സേവനമനുഷ്​ഠിക്കുന്നവരും ഇത്തരം കുറ്റകൃത്യങ്ങൾ നടത്തിയാൽ ശിക്ഷിക്കപ്പെടും. 14 വർഷം നീണ്ട പഠനത്തിനൊടുവിൽ ചൊവ്വാഴ്​ചയാണ്​ വത്തിക്കാൻ കോഡ്​ ഓഫ്​ കാനൻ നിയമത്തിൽ പുതിയ ഭേദഗതികൾ കൊണ്ടുവന്നത്​.

പള്ളികളിൽ പുരോഹിതന്മാർക്കുനേരെ ലൈംഗികാരോപണങ്ങൾ വർധിക്കുന്ന സാഹചര്യത്തിൽ അതു​ ചർച്ച ചെയ്യാൻ നിയമത്തിൽ 1395,1398 എന്നീ രണ്ട്​ വകുപ്പുകളാണ്​​ പുതുതായി ഉൾപ്പെടുത്തിയത്​. ബലഹീനരെയും പ്രായപൂർത്തിയാകാത്തവരെയും ചൂഷണം ചെയ്യുന്നവർക്കെതിരെ കർശന നടപടിയെടുക്കണമെന്നും ഇത്തരം കാര്യങ്ങളിൽ മൂടിവയ്ക്കലോ ഒതുക്കിത്തീർക്കലോ പാടില്ലെന്നും ഫ്രാൻസിസ് മാർപാപ്പ അംഗീകരിച്ച ഭേദഗതിയിൽ പറയുന്നു.