കൊയിലാണ്ടിയില്‍ ശ്രീധരന്‍ പിള്ളയുടെ എസ്കോര്‍ട്ട് വാഹനത്തിൽ ആംബുലൻസ് ഇടിച്ച് അപകടം

കോഴിക്കോട് കൊയിലാണ്ടിയിൽ ഗോവാ ഗവർണര്‍ പി.എസ് ശ്രീധരൻ പിള്ളയുടെ എസ്കോര്‍ട്ട് വാഹനത്തിൽ ആംബുലൻസ് ഇടിച്ച് അപകടം. ഫയർ ആൻഡ് റെസ്ക്യൂ വാഹനത്തിന്‍റെ പിറകിൽ ആംബുലൻസ് ഇടിച്ചാണ് അപകടമുണ്ടായത്. അപകടത്തില്‍ ആർക്കും പരിക്കില്ല.

കൊയിലാണ്ടി പൊലീസ് സ്റ്റേഷന് മുന്നിൽ വെള്ളിയാഴ്ച 7 മണിയോടെയായിരുന്നു സംഭവം. മീഞ്ചന്ത ഫയർ സ്റ്റേഷനിലെ വാഹനത്തിലാണ് കോഴിക്കോട് ജില്ലാ മാനസിക ആശുപത്രിയിലെ ആംബുലൻസ് ഇടിച്ചത്. ഫയർവാഹനം പെട്ടെന്ന് നിർത്തിയതാണ് കാരണം. കോഴിക്കോട് നിന്നും കണ്ണൂർ എയർപോർട്ടിലേക്ക് പോകുകയായിരുന്നു ഗവർണര്‍.