'വി. കുഞ്ഞികൃഷ്ണൻ്റേത് പൊട്ടക്കണക്ക്': കെ. കെ രാഗേഷ്

കണ്ണൂർ: വി.കുഞ്ഞികൃഷ്ണൻ പുറത്തുവിട്ടത് പൊട്ടക്കണക്കാണെന്ന് സിപിഎം കണ്ണൂർ ജില്ലാ സെക്രട്ടറി കെ.കെ. രാഗേഷ്. ധനരാജ് രക്തസാക്ഷി ഫണ്ടിൽ 40 ലക്ഷം ഓഫീസ് കെട്ടിട നിർമാണത്തിന് വകമാറ്റി.

വക മാറ്റിയ തുക തിരിച്ചുനൽകണമെന്ന് ജില്ലാ കമ്മിറ്റി ആവശ്യപ്പെട്ടു. ഈ രണ്ടും ചേർത്തുള്ള കണക്കാണ് കുഞ്ഞികൃഷ്ണൻ അവതരിപ്പിച്ചതെന്നും കെ.കെ രാ​ഗേഷ്.

പാർട്ടി കമ്മീഷൻ അന്വേഷിച്ച് തള്ളിയ ആരോപണം മാധ്യമങ്ങളിലൂടെ ഉന്നയിച്ചത് രാഷ്ട്രീയ ലക്ഷ്യത്തോടെ എന്നും രാഗേഷ്. ടി.ഐ മധുസൂദനൻ്റെ വികസന മുന്നേറ്റ ജാഥയിലാണ് സിപിഎം ജില്ലാ സെക്രട്ടറിയുടെ വിശദീകരണം.

ധനരാജ് രക്തസാക്ഷി ഫണ്ട് തട്ടിപ്പ് വിവാദത്തില്‍ മാധ്യമങ്ങളോട് കണക്ക് പറയേണ്ടതില്ലെന്ന് കെ.കെ രാഗേഷ് പറഞ്ഞിരുന്നു. മാധ്യമങ്ങള്‍ ജനങ്ങളെയാകെ പ്രതിനിധീകരിക്കുന്നവരല്ല. വരവ് ചെലവ് കണക്കുകള്‍ പാര്‍ട്ടി കമ്മിറ്റിയിലാണ് അവതരിപ്പിക്കാറ്. പൊതുജനങ്ങള്‍ ആവശ്യപ്പെട്ടാല്‍ കൊടുക്കുമെന്ന് പറഞ്ഞിട്ടുണ്ടെന്നും കെ.കെ രാഗേഷ് പറഞ്ഞു. വി. കുഞ്ഞികൃഷ്ണന്റെ പുസ്തക പ്രകാശന ചടങ്ങ് സിപിഎം വിരുദ്ധരുടെ ഒത്തുചേരലായിരുന്നെന്നും രാഗേഷ് വാര്‍ത്താസമ്മേളനത്തില്‍ പറഞ്ഞു.