ആര്യ രാജേന്ദ്രനും സച്ചിന്ദേവും വിവാഹിതരായി
ലളിതമായ ചടങ്ങില് മുഖ്യമന്ത്രി പിണറായി വിജയന്, മന്ത്രിമാര് ഉള്പ്പെടെയുള്ളവര് പങ്കെടുത്തു.
തിരുവനന്തപുരം മേയര് ആര്യ രാജേന്ദ്രനും ബാലുശേരി എം.എല്.എ സച്ചിന് ദേവും വിവാഹിതരായി. എകെജി സെന്ററില് വച്ച് രാവിലെ 11 മണിക്കായിരുന്നു വിവാഹം. ഇരുവരും പരസ്പരം ചുവന്ന പുഷ്പഹാരം അണിയിക്കുക മാത്രമാണ് ചെയ്തത്. ലളിതമായ ചടങ്ങില് മുഖ്യമന്ത്രി പിണറായി വിജയന്, സി.പി.എം സംസ്ഥാന സെക്രട്ടറി എം.വി ഗോവിന്ദന്, മന്ത്രിമാര് ഉള്പ്പെടെയുള്ളവര് പങ്കെടുത്തു.
സച്ചിൻദേവ് നിയമസഭയിലെ ഏറ്റവും പ്രായം കുറഞ്ഞ എം.എൽ.എയാണ്. ആര്യ രാജേന്ദ്രനാകട്ടെ രാജ്യത്തെ പ്രായം കുറഞ്ഞ മേയറും. കോഴിക്കോട് സ്വദേശിയാണ് സച്ചിൻ ദേവ്. സി.പി.എം കോഴിക്കോട് ജില്ലാ കമ്മിറ്റി അംഗമാണ്. നിയമ ബിരുദധാരിയാണ്.
എസ്.എഫ്.ഐ സംസ്ഥാന കമ്മിറ്റി അംഗവും സി.പി.എം ചാല ഏരിയ കമ്മിറ്റി അംഗവുമായ ആര്യ 21ആം വയസ്സിലാണ് മേയറായത്. തിരുവനന്തപുരം ആൾ സെയിന്റ്സ് കോളജിൽ വിദ്യാർഥിയായിരിക്കെയാണ് മേയറായത്. ബാലസംഘ കാലം മുതലേ പരിചയക്കാരാണ് ആര്യയും സച്ചിനും. മാർച്ച് ആറിനായിരുന്നു ഇരുവരുടെയും വിവാഹ നിശ്ചയം.
വിവാഹത്തിന് ഉപഹാരങ്ങളൊന്നും സ്വീകരിക്കില്ലെന്ന് സോഷ്യല് മീഡിയയില് പങ്കുവെച്ച ക്ഷണക്കത്തില് ആര്യ രാജേന്ദ്രന് നേരത്ത വ്യക്തമാക്കിയിരുന്നു. സ്നേഹോപഹാരങ്ങൾ നൽകണമെന്ന് ആഗ്രഹിക്കുന്നവർ നഗരസഭയുടെ വൃദ്ധസദനങ്ങളിലോ അഗതി മന്ദിരത്തിലോ മുഖ്യമന്ത്രിയുടെ ദുരിതാശ്വാസ നിധിയിലേക്കോ നൽകണമെന്നും ആര്യ അഭ്യര്ഥിച്ചിരുന്നു.
Adjust Story Font
16