കോഴിക്കോട് ജില്ലയിലെ പത്തു പഞ്ചായത്തുകളെ ക്രിട്ടിക്കല്‍ കണ്ടെയ്ൻമെന്‍റ് സോണായി പ്രഖ്യാപിച്ചു

ജില്ലയിലെ 10 പഞ്ചായത്തുകളെ ക്രിട്ടിക്കൽ കണ്ടെയ്ൻമെന്‍റ് സോണാക്കി പ്രഖ്യാപിച്ചു. ഒളവണ്ണ, വേളം, പെരുവയൽ, ചേമഞ്ചേരി, കടലുണ്ടി, മാവൂർ, ഫറോക്ക്, പനങ്ങാട്, ഉള്ള്യേരി, കക്കോടി എന്നീ പഞ്ചായത്തുകളെയാണ് ക്രിട്ടിക്കൽ കണ്ടെയ്ൻമെന്‍റ് സോണാക്കി പ്രഖ്യാപിച്ചത്. ഈ പഞ്ചായത്തുകളിൽ നിന്നും മെഡിക്കൽ ആവശ്യത്തിനു മാത്രമേ ആളുകൾ പുറത്തിറങ്ങാൻ പാടുള്ളൂ. ടെസ്റ്റ് പോസിറ്റിവിറ്റി റേറ്റ് 30 ശതമാനത്തിന് മുകളിലുള്ള പഞ്ചായത്തുകളിലാണ് നിയന്ത്രണം പ്രഖ്യാപിച്ചത്.

ഇന്ന് കോഴിക്കോട് ജില്ലയിൽ കോവിഡ് സ്ഥിരീകരിച്ചത് 5,015 പേർക്കാണ്. ജില്ലയിലെ ടെസ്റ്റ് പോസിറ്റിവിറ്റി റേറ്റ് 26.66 ആണ്. ഈ സാഹചര്യത്തിലാണ് ജില്ലയിൽ കൂടുതൽ നിയന്ത്രണങ്ങൾ കൊണ്ടുവരാൻ തീരുമാനിച്ചത്. ജില്ലയിലെ കണ്ടെയ്ൻമെന്റ് സോണുകളിലുള്ള റേഷൻ കടകളുടെ പ്രവർത്തന സമയം രാവിലെ ഒമ്പത് മണി മുതൽ മൂന്ന് മണിവരെയാക്കി ചുരുക്കി. ജില്ലയിൽ മുഴുവൻ നിയന്ത്രണം കർശനമാക്കാനാണ് ജില്ലാ ഭരണകൂടത്തിന്‍റെ തീരുമാനം.