ഐക്യരാഷ്ട്രസഭാ വിമൻ ശില്പശാലയിലേക്ക് തിരഞ്ഞെടുക്കപ്പെട്ട് എംഎസ്എഫ് സംസ്ഥാന സെക്രട്ടറി അഡ്വ. തൊഹാനി

കോഴിക്കോട്: ഐക്യരാഷ്ട്ര സഭയുടെ യുഎൻ വിമൺ ഷീ ലീഡ്‌സിലേക്ക് തിരഞ്ഞെടുക്കപ്പെട്ട് എംഎസ്എഫ് സംസ്ഥാന സെക്രട്ടറിയും റിസർച്ച് സ്കോളറുമായ അഡ്വ. തൊഹാനി. രാഷ്ട്രീയ രംഗത്ത് മികച്ച പ്രവർത്തനങ്ങൾ കാഴ്ചവയ്ക്കുന്ന വനിതാ നേതാക്കൾക്കായി യുഎൻ വിമൺ സംഘടിപ്പിക്കുന്ന ശില്പശാലയാണ് ഷീ ലീഡ്‌സ്. സ്ത്രീ ശാക്തീകരണവും രാഷ്ട്രീയ പൊതുരംഗത്തെ വനിതാ നേതാക്കളുടെ ഉന്നമനവും ലക്ഷ്യം വയ്ക്കുന്ന ഐക്യരാഷ്ട്രസഭാ സംഘടനയാണ് യുഎൻ വിമൺ.

ഡിസംബർ ആദ്യവാരമാണ് ഷീ ലീഡ്‌സ് ശില്പശാല നടക്കുന്നത്. മുസ്‌ലിം ലീഗിന്റെ വിദ്യാർഥിനി സംഘടനയായ ഹരിതയുടെ മലപ്പുറം ജില്ലാ പ്രസിഡന്റ് ആയാണ് തൊഹാനി വിദ്യാർഥി രാഷ്ട്രീയ നേതൃസ്ഥാനത്തേക്ക് വരുന്നത്. പിന്നീട് എംഎസ്എഫ് സംസ്ഥാന സെക്രട്ടറിയായി. നിലവിൽ അലയൻസ് യൂണിവേഴ്സിറ്റിയിൽ പിഎച്ച്ഡി റിസർച്ച് സ്കോളർ കൂടിയാണ് തൊഹാനി.

കോഴിക്കോട് ലോ കോളജിൽ നിന്ന് ബിഎ എൽഎൽബി ബിരുദവും കോഴിക്കോട് യൂണിവേഴ്സിറ്റി ലോ ഡിപ്പാർട്ട്മെന്റിൽ നിന്ന് ബിരുദാനന്തര ബിരുദവും കരസ്ഥമാക്കിയിട്ടുണ്ട്. സൗദി അറേബ്യയിൽ നടന്ന മിഡിൽഈസ്റ്റ് യൂത്ത് സമ്മിറ്റ് അടക്കം നിരവധി ദേശീയ അന്തർദേശീയ സെമിനാറുകളിൽ പങ്കെടുത്തിട്ടുണ്ട്. എംസിഡി ലോ കോളജിൽ അസിസ്റ്റന്റ് പ്രൊഫസർ ആയും വിവിധ സ്ഥാപനങ്ങളുടെ ലീഗൽ അഡ്വൈസർ ആയും സേവനമനുഷ്ഠിച്ചിട്ടുണ്ട്.

സ്ത്രീകൾക്കെതിരായ അതിക്രമങ്ങൾ തടയുന്നതിനും നിയമപരമായ പരിഹാരങ്ങൾ തേടുന്നതിനുമായുള്ള പഞ്ചായത്തുകളുടെ നേതൃത്വത്തിലുള്ള ജാഗ്രതാ സമിതികളിൽ ജോലിസ്ഥലത്തെ ലൈംഗിക പീഡനം തടയൽ നിയമത്തിന്റ ഭാഗമായ അവബോധ സെഷനുകളും പരിശീലനവും നൽകുന്നുണ്ട്. ന്യൂനപക്ഷ രാഷ്ട്രീയം, വിദ്യാഭ്യാസം, സമകാലിക വിഷയങ്ങൾ തുടങ്ങിയ മേഖലകളിൽ എഡിറ്റോറിയൽ ലേഖനങ്ങളും കോളങ്ങളും പ്രസിദ്ധീകരിച്ചിട്ടുണ്ട്.

പാർലമെന്റിൽ കഴിഞ്ഞ മാസം നടന്ന ഇൻസ്റ്റിറ്റ്യൂട്ട് ഓഫ് കോൺസ്റ്റിറ്റ്യൂഷനൽ ആൻഡ് പാർലമെന്ററി സ്റ്റഡീസും നാഷണൽ ലോ യൂണിവേഴ്‌സിറ്റിയും ചേർന്ന് സംഘടിപ്പിച്ച നിയമനിർമാണവുമായി ബന്ധപ്പെട്ട കോഴ്സിലേക്കും അഡ്വ തൊഹാനിയെ തിരഞ്ഞെടുത്തിരുന്നു. ഇന്ത്യൻ ഇൻസ്റ്റിറ്റ്യൂട്ട് ഓഫ് മാനേജ്‌മന്റ്, ഇന്ത്യൻ സൊസൈറ്റി ഓഫ് ഇന്റർനാഷണൽ ലോ, ഇന്ത്യൻ കൗൺസിൽ ഓഫ് സോഷ്യൽ സയൻസ് റിസർച്ച്, നാഷണൽ ലോ യൂണിവേഴ്സിറ്റി, ഇന്ത്യൻ ലോ ഇൻസ്റ്റിറ്റ്യൂട്ട്, ലെഡ് ബൈ ഫൗണ്ടേഷൻ തുടങ്ങി രാജ്യത്തെ വിവിധ സ്ഥാപനങ്ങളിൽ നിന്ന് വിവിധ കോഴ്സുകളും പരിശീലനങ്ങളും നേടിയിട്ടുണ്ട്.