പിഎസ്‌സി പരീക്ഷ ക്രമക്കേട്; എം.ആർ ബൈജുവിന് വീണ്ടും എസ്ഐടി നോട്ടീസ്

തിരുവനന്തപുരം: പിഎസ്‌സി പരീക്ഷ ക്രമക്കേട് കേസിൽ ചോദ്യം ചെയ്യലിന് ഹാജരാകണം എന്നാവശ്യപ്പെട്ട് ചെയർമാന് വീണ്ടും എസ്ഐടിയുടെ നോട്ടീസ്. ചൊവ്വാഴ്ച ചോദ്യം ചെയ്യലിന് ഹാജരാകണമെന്ന് നിർദേശം. കേസിൽ നോട്ടീസ് നൽകിയിരുന്നെങ്കിലും എം.ആർ ബൈജു കഴിഞ്ഞ ദിവസം ചോദ്യംചെയ്യലിന് ഹാജരായിരുന്നില്ല.

ഇക്കാര്യം രേഖാമൂലം എസ്ഐടിയെ അറിയിച്ചു. ഹൈക്കോടതിയുടെ ഉത്തരവ് വന്നതിനുശേഷം മാത്രമായിരിക്കും ഹാജരാകുന്നതിൽ തീരുമാനം. എം.ആർ ബൈജുവിനെ വീണ്ടും ചോദ്യം ചെയ്യുന്നതിൽ പ്രത്യേക അന്വേഷണസംഘം നിയമോപദേശത്തിനായി കാത്തുനിൽക്കുകയാണ്.

അറസ്റ്റ് ഭയന്നാണോ ഈ തീരുമാനമെന്ന ചോദ്യങ്ങൾക്കിടയിലും, നിയമപരമായ സുരക്ഷ മുൻനിർത്തി കോടതിയുടെ അന്തിമ ഉത്തരവിനായി കാത്തിരിക്കാനാണ് അദ്ദേഹത്തിന്റെ വാദം. അതേസമയം, പ്രത്യേക അന്വേഷണ സംഘത്തിന്റെ ചോദ്യം ചെയ്യലിൽ പരീക്ഷയില്‍ 58 മാര്‍ക്കിന്റെ മൂല്യനിര്‍ണയം നടത്താതിരുന്നത് സാങ്കേതിക പിഴവ് കാരണമെന്ന് പിഎസ്‌സി പരീക്ഷ വിഭാഗം അഡീഷണല്‍ സെക്രട്ടറി ആര്‍. ഹരി വ്യക്തമാക്കിയിരുന്നു.

വരും ദിവസങ്ങളില്‍ പിഎസ്‌സിയിലെ കൂടുതല്‍ അംഗങ്ങളെ ചോദ്യം ചെയ്യാനാണ് തീരുമാനം. പരീക്ഷാ മൂല്യനിര്‍ണയത്തിലെ വീഴ്ചകള്‍ സാങ്കേതികം മാത്രമെന്ന് പിഎസ്‌സി ഹൈക്കോടതിയെ അറിയിച്ചിരുന്നു. ശ്രദ്ധയില്‍പ്പെട്ട ഉടന്‍ പുനര്‍മൂല്യനിര്‍ണയം നടത്തി ചുരുക്കപ്പട്ടിക പ്രസിദ്ധീകരിച്ചുവെന്നും പിഎസ്‌സി അവകാശപ്പെട്ടിരുന്നു. ആസൂത്രണ ബോര്‍ഡ് പരീക്ഷയുമായി ബന്ധപ്പെട്ട ക്രമക്കേടില്‍ രജിസ്റ്റര്‍ ചെയ്ത എഫ്ഐആര്‍ റദ്ദാക്കണമെന്നാവശ്യപ്പെട്ട് സമര്‍പ്പിച്ച ഹരജി പരിഗണിക്കവെ ആയിരുന്നു പിഎസ്‌സിയുടെ ഈ വാദങ്ങൾ.