15,000 രൂപ മുതൽ 20 ലക്ഷം വരെ സ്കോളർഷിപ്പ്; അപേക്ഷിക്കാനുള്ള അവസാന തിയതി നവംബർ 15

കോഴിക്കോട്: സ്റ്റേറ്റ് ബാങ്ക് ഓഫ് ഇന്ത്യയുടെ (എസ്ബിഐ) പ്ലാറ്റിനം ജൂബിലി ആശാ സ്‌കോളര്‍ഷിപ്പ് 2025 പ്രോഗ്രാമിലേക്ക് അപേക്ഷിക്കാൻ ഇനി ആറ് ദിവസം മാത്രം. 23,230 വിദ്യാർഥികൾ പ്രോഗ്രാമിന്റെ ഗുണഭോക്താക്കളാകും. അപേക്ഷിക്കാനുള്ള അവസാന തിയതി നവംബർ 15 വരെ.

പ്രധാന ആനുകൂല്യങ്ങളും ധനസഹായവും

കോഴ്സിനെ ആശ്രയിച്ച് പ്രതിവർഷം 15,000 രൂപ മുതൽ 20 ലക്ഷം രൂപ വരെയാണ് സ്കോളർഷിപ്പിലൂടെ സാമ്പത്തിക സഹായം ലഭിക്കുക. പഠനം പൂർത്തിയാകുന്നതുവരെ സഹായം ലഭിക്കും. ട്യൂഷൻ ഫീസും മറ്റ് വിദ്യാഭ്യാസ ചെലവുകളും ഉൾപ്പെടെ സമഗ്രമായ സാമ്പത്തിക സഹായമാണ് ഈ പദ്ധതിയിലൂടെ ലഭിക്കുക.

ആർക്കൊക്കെ അപേക്ഷിക്കാം?

• ഒമ്പതാം ക്ലാസ് മുതൽ ബിരുദാനന്തര ബിരുദം വരെയുള്ള ഇന്ത്യൻ വിദ്യാർഥികൾക്ക് സ്കോളർഷിപ്പിനായി അപേക്ഷിക്കാം.
• ഐഐടികൾ, ഐഐഎമ്മുകൾ, മെഡിക്കൽ, പ്രൊഫഷണൽ സ്ഥാപനങ്ങളിൽ പഠിക്കുന്നവർക്കും അപേക്ഷിക്കാം.
• കൂടാതെ, വിദേശത്ത് പഠിക്കാൻ ആഗ്രഹിക്കുന്ന വിദ്യാർഥികൾക്കും അപേക്ഷിക്കാവുന്നതാണ്.
• എൻഐആർഎഫ് (NIRF) ടോപ്പ് 300-ൽ ഉൾപ്പെട്ടതോ, നാക് (NAAC) 'എ' റേറ്റിംഗ് ലഭിച്ചതോ ആയ സ്ഥാപനങ്ങളിൽ പഠിക്കുന്നവർക്കും സഹായം ലഭിക്കും.

യോഗ്യതാ മാനദണ്ഡങ്ങൾ

• വിദ്യാർഥികൾ മുൻ അധ്യയന വർഷത്തിൽ കുറഞ്ഞത് 75 ശതമാനം മാർക്ക് അല്ലെങ്കിൽ 7.0 സിജിപിഎ നേടിയിരിക്കണം.
• കുടുംബ വാർഷിക വരുമാനം സ്കൂൾ വിദ്യാർഥികൾക്ക് 3 ലക്ഷം രൂപയിലും കോളേജ്/പിജി വിദ്യാർത്ഥികൾക്ക് 6 ലക്ഷം രൂപയിലും കവിയരുത്.
• പട്ടികജാതി/ പട്ടിക വർഗ വിഭാഗത്തിൽപെട്ട വിദ്യാർഥികൾക്ക് 10% ഇളവുണ്ട്. മുൻ അധ്യയന വർഷത്തിൽ കുറഞ്ഞത് 67.50% മാർക്ക് അല്ലെങ്കിൽ 6.30 സിജിപിഎ നേടിയിരിക്കണം.
• പെൺകുട്ടികൾക്ക് 50% സീറ്റുകളിൽ സംവരണമുണ്ട്.
• SC/ ST വിഭാഗക്കാർക്ക് 25% സീറ്റുകകളിൽ സംവരണമുണ്ട്.

അപേക്ഷ സമർപ്പിക്കേണ്ട വിധം

അപേക്ഷകൾ 2025 നവംബർ 15-ന് മുമ്പായി ഔദ്യോഗിക പോർട്ടലായ https://www.sbiashascholarship.co.in/ വഴി ഓൺലൈനായി സമർപ്പിക്കാം. വിദ്യാർത്ഥികൾ അക്കാദമിക് വിവരങ്ങൾ പൂരിപ്പിക്കുകയും ആവശ്യമായ രേഖകൾ അപ്‌ലോഡ് ചെയ്യുകയും വേണം.

പഠനതലവും സ്കോളർഷിപ്പ് തുകയും

1. 9-12 ക്ലാസ് - 15,000 രൂപ
2. അണ്ടർ​ഗ്രാജുവേറ്റ് ഏതെങ്കിലും വർഷം -75,000 രൂപ
3. പോസ്റ്റു​ഗ്രാജുവേറ്റ് ഏതെങ്കിലും വർഷം -രണ്ടരലക്ഷം വരെ
4. മെഡിക്കൽ ബി​രുദം ഏതെങ്കിലും വർഷം -നാലരലക്ഷം വരെ
5. ഐഐടി-യുജി ഏതെങ്കിലും വർഷം -2 ലക്ഷം വരെ
6. ഐഐഎം; എംബിഎ/പിജിഡിഎം-ഏതെങ്കിലും വർഷം- 5 ലക്ഷം വരെ
7. വിദേശപഠനം (പട്ടിക വിഭാ​ഗം) -20 ലക്ഷം വരെ