'ഭാഷാ വി​വേചനം അവസാനിപ്പിക്കണം'; നഴ്സുമാർ മലയാളം സംസാരിക്കുന്നത് വിലക്കിയ നടപടിക്കെതിരെ രാഹുൽ ഗാന്ധി

ജോലിസമയത്ത് നഴ്​സു​മാർ മലയാളം സംസാരിക്കുന്നതിന്​ ​വിലക്കിയ ഡൽഹിയിലെ ജി.ബി പന്ത്​ ആശുപത്രി അധികൃതരുടെ നടപടി​ക്കെതിരെ വ്യാപക പ്രതിഷേധം. ആശുപത്രി അധികൃതരുടെ സർക്കുലറിനെതിരെ കോൺഗ്രസ്​ നേതാവ്​ രാഹുൽ ഗാന്ധി രം​ഗത്തെത്തി. മലയാളം മറ്റെല്ലാ ഇന്ത്യൻ ഭാഷകളെയും പോലെയാണെന്നും ഭാഷാപരമായ വിവേചനം അവസാനിപ്പിക്കണമെന്നും രാഹുൽ ഫേസ്ബുക്കിൽ കുറിച്ചു.

ആശുപത്രി അധികൃതർ ഉത്തരവ്​ പിൻവലിച്ച്​ മാപ്പ്​ പറയണമെന്ന്​ നഴ്​സസ്​ യൂനിയനും ആവശ്യപ്പെട്ടു. തൊഴിൽ സമയത്ത്​ നഴ്​സിങ്​ ജീവനക്കാർ തമ്മിൽ മലയാളം സംസാരിക്കുന്നത്​ രോഗികൾക്കും സഹപ്രവർത്തകർക്കും ബുദ്ധിമുട്ടുണ്ടാകുന്നതായി പരാതി ലഭിച്ചിട്ടുണ്ടെന്ന്​ വിശദീകരിച്ചാണ്​​ ഡൽഹിയിലെ ജി.ബി പന്ത്​ ആശുപത്രി അധികൃതർ മലയാളത്തിന്​ വി​ലക്കേർപ്പെടുത്തി ​സർക്കുലർ ഇറക്കിയത്​. ഹിന്ദി അല്ലെങ്കിൽ ഇംഗ്ലീഷ് സംസാരിച്ചില്ലെങ്കിൽ കടുത്ത നടപടി ഉണ്ടാകുമെന്നാണ് മുന്നറിയിപ്പ്. സർക്കുലറിനെതിരെ ഡൽഹിയിലെ വിവിധ ആശുപത്രികളിൽ ഉള്ള മലയാളി നഴ്സുമാർ പ്രതിഷേധത്തിന് ഒരുങ്ങുകയാണ്.