താനൂർ താമിർ ജിഫ്രി വധക്കേസ്; ഉന്നത പൊലീസ് ഉദ്യോ​ഗസ്ഥരെ സംരക്ഷിക്കുന്നുവെന്ന് സഹോദരൻ ഹാരിസ് ജിഫ്രി

മലപ്പുറം: താനൂർ താമിർ ജിഫ്രി വധക്കേസിൽ ഉന്നത പൊലീസ് ഉദ്യോഗസ്ഥരെ സംരക്ഷിക്കുന്നതായി സഹോദരൻ. കൊലപാതകം നരഹത്യയാക്കി ഇവർ മാറ്റി. തുടരന്വേഷണത്തിന് കോടതിയെ സമീപിക്കും. എസ്.ഐ ശ്രീജിത്തിന്റെ വെളിപ്പെടുത്തൽ ഉന്നത പൊലീസ് ഉദ്യോ​ഗസ്ഥരെ സംരക്ഷിക്കുന്നതിന്റെ ഉദാഹരണമെന്ന് ഹാരിസ് ജിഫ്രി മീഡിയവണിനോട് പറഞ്ഞു.

കേസിൽ നിന്ന് ഉന്നത ഉദ്യോ​ഗസ്ഥർ സംരക്ഷിക്കപ്പെട്ടുപോകുന്നതായും താഴെതട്ടിലുള്ള പ്രതികളിലേക്ക് കുറ്റം ചാർത്തുകയാണെന്നും കുടുംബം നേരത്തെ ആക്ഷേപമുന്നയിച്ചിരുന്നു.

'കൊലപാതകം നടത്തിയ ഡാൻസാഫ് ഉദ്യോ​ഗസ്ഥർ ഇപ്പോഴും ജോലിയിലുണ്ട്. ഇവർക്കെതിരെ നിൽക്കുന്നവരെ ചവിട്ടിത്താഴ്ത്തുക എന്ന ലക്ഷ്യമാണ് ഇവർക്കുള്ളത്. എസ്ഐ കൃഷ്ണലാലിന്റെ കാര്യത്തിലും ഇതുണ്ടായി. ഇതിന്റെ ഉദാഹരണമാണ് ശ്രീജിത്തിന്റെ വെളിപ്പെടുത്തൽ.' ഹാരിസ് ജിഫ്രി പറഞ്ഞു.

'എസ്പിയുടെ നിയന്ത്രണത്തിലാണ് ഇവരെല്ലാവരും. ഈ കേസിൽ ചേളാരിയിൽ നിന്ന് പിടികൂടിയിട്ട് താനൂര് വരെ കൊണ്ടുവന്നത് ആരാണെന്ന് നമുക്കിതുവരെ ഉത്തരം കിട്ടിയിട്ടില്ല. അവരുടെ കസ്റ്റഡിയിൽ വെച്ചാണ് എന്റെ അനിയൻ മരിച്ചത്.' അദ്ദേഹം കൂട്ടിച്ചേർത്തു.

കേസിൽ പ്രതികളായ മുതിർന്ന ഉദ്യോ​ഗസ്ഥരെ നേരത്തെ ചിലർ സംരക്ഷിക്കുന്നുവെന്നും ചെറിയ ഉദ്യോ​ഗസ്ഥരെ ബലിയാടാക്കുകയാണെന്നും കുടും​ബം നേരത്തെ പരാതിപ്പെട്ടിരുന്നു. ഈ പരാതി ശരിവെക്കുന്ന വിധത്തിലാണ് മുൻ എസ്ഐ സുജിത്ദാസിന്റെ വെളിപ്പെടുത്തൽ. തുടരന്വേഷണം ആവശ്യപ്പെട്ടുകൊണ്ട് ഹൈക്കോടതിയെ സമീപിക്കാനൊരുങ്ങുകയാണ് കുടുംബം.