പോഷ് നിയമത്തില് അവബോധം ശക്തമാക്കാന് സിനിമാ മേഖലയില് പരിശീലന പരിപാടി
സംസ്ഥാനതല ഉദ്ഘാടനം ഏപ്രില് 3 വ്യാഴാഴ്ച രാവിലെ 11 മണിക്ക്
തിരുവനന്തപുരം: സിനിമാ മേഖലയില് പ്രവര്ത്തിക്കുന്നവരുടെ ഇടയില് പോഷ് നിയമത്തെപ്പറ്റി അവബോധം സൃഷ്ടിക്കാൻ വനിതാ ശിശു വികസന വകുപ്പ് ജെന്ഡര് പാര്ക്കിന്റെ സഹായത്തോടുകൂടി പരിശീലന പരിപാടി സംഘടിപ്പിക്കുന്നു. ആദ്യഘട്ടമായി സിനിമാ വ്യവസായത്തിലെ വിവിധ മേഖലകളില് നിന്നുള്ള 60 പേരെ ഉള്പ്പെടുത്തിയാണ് പരിശീലന പരിപാടി. സംസ്ഥാനതല ഉദ്ഘാടനം ഏപ്രില് 3 വ്യാഴാഴ്ച രാവിലെ 11 മണിക്ക് ആരോഗ്യ വനിത ശിശു വികസന വകുപ്പ് മന്ത്രി വീണാ ജോര്ജ് നിര്വഹിക്കും. ചീഫ് സെക്രട്ടറി ശാരദാ മുരളീധരന് അദ്ധ്യക്ഷത വഹിക്കും. സിനിമാ രംഗത്തെ പ്രമുഖര് പങ്കെടുക്കും.
പോഷ് ആക്ട് 2013ന്റേയും ജസ്റ്റിസ് ഹേമ കമ്മിറ്റി റിപ്പോര്ട്ടിന്റേയും വെളിച്ചത്തില് ഒരു സിനിമ രൂപപ്പെടുമ്പോള് ഈ മേഖലയില് പ്രവര്ത്തിക്കുന്ന എല്ലാവര്ക്കും സുരക്ഷിതമായ തൊഴില് അന്തരീക്ഷം ഉറപ്പ് വരുത്തേണ്ടതുണ്ട്. ഇത് കണക്കിലെടുത്തുകൊണ്ട് സിനിമാ വ്യവസായ മേഖലയെ ഈ നിയമത്തിന്റെ പരിധിയില് കൊണ്ടുവരുന്നതിനുള്ള പ്രവര്ത്തനങ്ങള് വനിത ശിശുവികസന വകുപ്പ് മുഖേന സര്ക്കാര് ആരംഭിച്ചിട്ടുണ്ട്. ഇതിന്റെ ഭാഗമായാണ് പരിശീലന പരിപാടി സംഘടിപ്പിക്കുന്നത്.
Adjust Story Font
16