സെക്രട്ടറിയേറ്റിലേക്ക് യൂത്ത് ലീഗ് സേവ് കേരള മാർച്ച്; കാൽലക്ഷം പേർ പങ്കെടുക്കും

കോഴിക്കോട്: ഇടതുസർക്കാറിനെതിരായ പ്രക്ഷോഭം ശക്തമാക്കുന്നതിന്റെ ഭാഗമായി ജനുവരി 18ന് കാൽലക്ഷം പ്രവർത്തകരെ അണിനിരത്തി സെക്രട്ടറിയേറ്റിലേക്ക് സേവ് കേരള മാർച്ച് സംഘടിപ്പിക്കുമെന്ന് യൂത്ത് ലീഗ് സംസ്ഥാന ജനറൽ സെക്രട്ടറി പി.കെ ഫിറോസ് വാർത്താസമ്മേളനത്തിൽ അറിയിച്ചു. മാർച്ചിന് മുന്നോടിയായി സർക്കാറിന്റെ ജനവിരുദ്ധനയങ്ങൾ വിശദീകരിക്കാൻ ജനുവരി ആദ്യവാരം നിയോജകമണ്ഡലം തലത്തിൽ വാഹനപ്രചാരണ ജാഥ സംഘടിപ്പിക്കും.

യൂത്ത് ലീഗിന്റെ പ്രഥമ സംസ്ഥാന കമ്മിറ്റി നിലവിൽ വന്നിട്ട് 2023 ജനുവരി ഒന്നിന് 50 വർഷം പൂർത്തിയാകുന്നതിനാൽ അടുത്ത ഒരു വർഷം സംഘടനയുടെ ഗോൾഡൻ ജൂബിലി വർഷമായി വിവിധ പരിപാടികൾ നടത്താൻ വൈത്തിരിയിൽ സമാപിച്ച സംസ്ഥാന എക്‌സിക്യൂട്ടീവ് ക്യാമ്പ് തീരുമാനിച്ചതായും ഫിറോസ് അറിയിച്ചു.

ജനുവരി രണ്ടിന് കോഴിക്കോട് കടപ്പുറത്ത് 50 പതാകകൾ ഉയർത്തി ഗോൾഡൻ ജൂബിലി പരിപാടികൾക്ക് തുടക്കം കുറിക്കും. ജൂബിലി ആഘോഷങ്ങളുടെ ഭാഗമായി യുവോത്സവം, യൂത്ത് ടെസ്റ്റ് എന്നിവയും സംഘടിപ്പിക്കും.