യൂട്യൂബര് തൊപ്പിക്ക് മുന്കൂര് ജാമ്യം
ലക്ഷം രൂപയുടെ ബോണ്ട് ഉള്പ്പെടെയുള്ള വ്യവസ്ഥകളിലാണ് മുന്കൂര് ജാമ്യം
കൊച്ചി: യൂട്യൂബ് ലൈവില് സ്ത്രീത്വത്തെ അപമാനിച്ചുവെന്ന കേസില് തൊപ്പി എന്ന പേരില് അറിയപ്പെടുന്ന യൂട്യൂബര് മുഹമ്മദ് നിഹാദിന് ഹൈക്കോടതിയില് നിന്ന് മുന്കൂര് ജാമ്യം. ഒരു ലക്ഷം രൂപയുടെ ബോണ്ട് ഉള്പ്പെടെയുള്ള വ്യവസ്ഥകളിലാണ് മുന്കൂര് ജാമ്യം. വിഡിയോയില് പരാതിക്കാരിയെ നേരിട്ട് ബാധിക്കുന്ന ഉള്ളടക്കമില്ലെന്ന് പ്രഥമദൃഷ്ട്യാ വിലയിരുത്തിയാണ് ജസ്റ്റിസ് കൗസര് എടപ്പഗത്ത് ഉപാധികളോടെ മുന്കൂര്ജാമ്യം അനുവദിച്ചത്.
ജൂണ് 10ന് യൂട്യൂബ് ചാനലില് നാലു മണിക്കൂറോളം നീണ്ട ഒരു ലൈവിനിടെ മഞ്ചേരി സ്വദേശിയുടെ സമ്മതമില്ലാതെ ചിത്രങ്ങളും വീഡിയോകളും പ്രദര്ശിപ്പിക്കുകയും വ്യക്തിഹത്യ നടത്തുന്ന തരത്തില് അശ്ലീല പരാമര്ശങ്ങള് നടത്തിയെന്നുമാണ് കേസ്. സ്ത്രീത്വത്തെ അപമാനിക്കല്, ഐടി നിയമ വകുപ്പുകള് എന്നിവ ചുമത്തി മഞ്ചേരി പൊലീസാണ് നിഹാദിനെതിരെ കേസെടുത്തത്.
മുന്കൂര് ജാമ്യ ഹരജി മഞ്ചേരി ജില്ല സെഷന്സ് കോടതി തള്ളിയതിനെ തുടര്ന്നാണ് ഹൈകോടതിയെ സമീപിച്ചത്. ഒരു ലക്ഷം രൂപയുടെ സ്വന്തം ബോണ്ടും തത്തുല്യമായ രണ്ട് ആള് ജാമ്യവുമാണ് മുഖ്യവ്യവസ്ഥ. എല്ലാ ശനിയാഴ്ചയും രാവിലെ അന്വേഷണ ഉദ്യോഗസ്ഥന് മുമ്പാകെ ഹാജരാകണം, കോടതിയുടെ അനുമതിയില്ലാതെ കേരളം വിടരുത് തുടങ്ങിയവയാണ് മറ്റ് ഉപാധികള്.
Adjust Story Font
16