വിലകൂടിയ വിറ്റാമിൻ സി സെറം ഇനി വാങ്ങേണ്ട! വീട്ടിൽ തന്നെ തയ്യാറാക്കാം, അറിയാം ചേരുവകളും ഉപയോഗിക്കേണ്ട രീതിയും

മുഖത്തിന് തിളക്കം നൽകാനും കറുത്ത പാടുകൾ കുറയ്ക്കാനും വിറ്റാമിൻ സി സെറം ഉപയോഗിക്കുന്നവരാണ് അധികവും. എന്നാൽ വിപണിയിലെ വിലകൂടിയ ഉൽപ്പന്നങ്ങൾക്ക് പകരം വീട്ടിൽ തന്നെ സെറം തയ്യാറാക്കാനാകുമോ? ആവശ്യമായ ചേരുവകളും തയ്യാറാക്കുന്ന രീതിയും അറിയാം.ചർമ്മസംരക്ഷണത്തിൽ ഏറെ പ്രാധാന്യമുള്ള ഘടകമാണ് വിറ്റാമിൻ സി. ശക്തമായ ആന്റിഓക്സിഡന്റായ ഇത് ഫ്രീ റാഡിക്കലുകൾ മൂലമുണ്ടാകുന്ന ചർമ്മത്തിലെ കേടുപാടുകൾ കുറയ്ക്കാൻ സഹായിക്കുന്നു. കൊളാജൻ ഉൽപ്പാദനത്തെ പിന്തുണയ്ക്കുന്നതിനൊപ്പം ചർമ്മത്തിലെ നിറവ്യത്യാസവും കറുത്ത പാടുകളും കുറയ്ക്കാനും വിറ്റാമിൻ സി സഹായകമാണ്.

ഇക്കാരണങ്ങളാൽ തന്നെ വിറ്റാമിൻ സി സെറത്തിന് സൗന്ദര്യസംരക്ഷണത്തിൽ വലിയ പ്രചാരമുണ്ട്. എന്നാൽ വിപണിയിൽ ലഭിക്കുന്ന പല ബ്രാൻഡുകളുടെയും സെറങ്ങൾക്ക് ഉയർന്ന വിലയാണ്.

ചർമ്മത്തിന് വിറ്റാമിൻ സി നൽകുന്ന ഗുണങ്ങൾ എന്തൊക്കെ?

ചർമ്മത്തിന്റെ ആരോഗ്യം നിലനിർത്തുന്നതിൽ വിറ്റാമിൻ സി പ്രധാന പങ്കുവഹിക്കുന്നു. ഇതിന്റെ ആന്റിഓക്സിഡന്റ് ഗുണങ്ങൾ ചർമ്മത്തെ ഓക്സിഡേറ്റീവ് സമ്മർദത്തിൽ നിന്ന് സംരക്ഷിക്കാൻ സഹായിക്കും.

ചർമ്മത്തിലെ കറുത്ത പാടുകളും നിറവ്യത്യാസവും കുറയ്ക്കാൻ സഹായിക്കുന്നു, കൊളാജൻ ഉൽപ്പാദനത്തെ പിന്തുണയ്ക്കുന്നു, ചർമ്മത്തിന് തിളക്കം നൽകാൻ സഹായിക്കുന്നു, നേർത്ത വരകൾ കുറയ്ക്കാൻ സഹായകമായേക്കാം, സൂര്യപ്രകാശം മൂലമുള്ള ചർമ്മനാശത്തിനെതിരെ ആന്റിഓക്സിഡന്റ് സംരക്ഷണം നൽകുന്നു.ചർമ്മത്തിന്റെ മൊത്തത്തിലുള്ള ആരോഗ്യം മെച്ചപ്പെടുത്താൻ സഹായിക്കുന്നു.

വീട്ടിൽ വിറ്റാമിൻ സി സെറം തയ്യാറാക്കാൻ വേണ്ട ചേരുവകൾ

റോസ് വാട്ടർ – 8 സ്പൂൺ

ഗ്ലിസറിൻ – 1 സ്പൂൺ

വിറ്റാമിൻ ഇ ക്യാപ്സ്യൂൾ – 2 എണ്ണം

തയ്യാറാക്കുന്ന വിധം

ആദ്യം വൃത്തിയുള്ള ഒരു ഗ്ലാസ് പാത്രത്തിൽ വിറ്റാമിൻ സി പൗഡറും റോസ് വാട്ടറും ചേർത്ത് നന്നായി യോജിപ്പിക്കുക. ഇതിലേക്ക് ഗ്ലിസറിൻ ചേർക്കാം. തുടർന്ന് വിറ്റാമിൻ ഇ ക്യാപ്സ്യൂളുകൾ തുറന്ന് അതിലെ എണ്ണയും മിശ്രിതത്തിലേക്ക് ചേർക്കുക. എല്ലാ ചേരുവകളും നന്നായി കലർത്തിയാൽ സെറം തയ്യാറായി.

എങ്ങനെ സൂക്ഷിക്കണം?

വീട്ടിൽ തയ്യാറാക്കുന്ന സെറം സൂക്ഷിക്കുമ്പോൾ പ്രത്യേക ശ്രദ്ധ വേണം. വിറ്റാമിൻ സി വായുവും വെളിച്ചവും ഏൽക്കുമ്പോൾ ഓക്സിഡൈസ് ചെയ്ത് ഗുണം നഷ്ടപ്പെടാൻ സാധ്യതയുണ്ട്. അതിനാൽ വൃത്തിയുള്ള, വായു കടക്കാത്ത ഇരുണ്ട ഗ്ലാസ് കുപ്പിയിൽ സൂക്ഷിക്കുന്നതാണ് ഉചിതം.

വീട്ടിൽ തയ്യാറാക്കുന്ന മിശ്രിതത്തിൽ സംരക്ഷക ഘടകങ്ങൾ ഇല്ലാത്തതിനാൽ ദീർഘകാലം ഉപയോഗിക്കരുത്. ഫ്രിഡ്ജിൽ സൂക്ഷിച്ചാലും 15-20 ദിവസം സുരക്ഷിതമായി നിലനിൽക്കുമെന്ന് ഉറപ്പില്ല.

മുഖത്ത് എങ്ങനെ ഉപയോഗിക്കാം?

മുഖം നന്നായി വൃത്തിയാക്കിയ ശേഷം ചെറിയ അളവിൽ സെറം പുരട്ടാമെന്നാണ് നിർദേശം. എന്നാൽ വീട്ടിൽ തയ്യാറാക്കിയ ഈ മിശ്രിതം നേരിട്ട് മുഖത്ത് ഉപയോഗിക്കുന്നതിന് മുമ്പ് കൈയുടെ ചെറിയ ഭാഗത്ത് പരീക്ഷിക്കണം. ചുവപ്പ്, ചൊറിച്ചിൽ, നീറ്റൽ തുടങ്ങിയ പ്രശ്നങ്ങളുണ്ടാകുന്നുണ്ടോയെന്ന് നിരീക്ഷിക്കുക.വിറ്റാമിൻ സി ഉപയോഗിക്കുന്നതിനൊപ്പം പകൽ സമയത്ത് സൺസ്ക്രീൻ ഉപയോഗിക്കുന്നതും പ്രധാനമാണ്.

ശ്രദ്ധിക്കേണ്ട കാര്യങ്ങൾ

വീട്ടിൽ തയ്യാറാക്കുന്ന വിറ്റാമിൻ സി സെറത്തിന്റെ പി.എച്ച് മൂല്യം, സാന്ദ്രത, സ്ഥിരത എന്നിവ കൃത്യമായി നിയന്ത്രിക്കാൻ കഴിയില്ല. അതിനാൽ മുഖത്ത് പ്രകോപനമോ അലർജിയോ ഉണ്ടാകാൻ സാധ്യതയുണ്ട്. പ്രത്യേകിച്ച് സെൻസിറ്റീവ് ചർമ്മമുള്ളവർ ഇത്തരം മിശ്രിതങ്ങൾ ഉപയോഗിക്കുന്നതിന് മുമ്പ് ഡെർമറ്റോളജിസ്റ്റിന്റെ ഉപദേശം തേടണം.

ഓർക്കുക: വീട്ടിൽ തയ്യാറാക്കുന്ന സെറം വിപണിയിലെ ഗുണനിലവാരം പരിശോധിച്ച ഉൽപ്പന്നങ്ങൾക്ക് തുല്യമാണെന്ന് ഉറപ്പില്ല. ചർമ്മസംരക്ഷണത്തിന് അനുയോജ്യമായ ഉൽപ്പന്നങ്ങൾ തിരഞ്ഞെടുക്കുന്നതാണ് സുരക്ഷിതമായ മാർഗം