സൗദിയില്‍ കാലാവസ്ഥാ മാറ്റത്തിന് മുന്നോടിയായി മഴ പെയ്യുന്നു; കോവിഡ് സാഹചര്യത്തില്‍ ജാഗ്രത പാലിക്കണം 

സൌദിയുടെ വിവിധ ഭാഗങ്ങളില്‍ കൊടും ചൂടിലേക്കുള്ള കാലാവസ്ഥാ മാറ്റത്തിന് മുന്നോടിയായി മഴ തുടങ്ങി. റിയാദ്, മക്ക തുടങ്ങി വിവിധ ഭാഗങ്ങളില്‍ മഴ തുടരുന്നുണ്ട്. ആരോഗ്യ പ്രയാസങ്ങള്‍ക്ക് സാധ്യതയുള്ളതിനാല്‍ ജാഗ്രത പാലിക്കണമെന്ന് ആരോഗ്യ മന്ത്രാലയം മുന്നറിയിപ്പ് നല്‍കി. കോവിഡ് സാഹചര്യത്തില്‍ ആരോഗ്യ പ്രയാസങ്ങളുണ്ടായാല്‍ പുറത്ത് പോകാന്‍ 997 എന്ന നമ്പറിലാണ് ബന്ധപ്പെടേണ്ടത്. കാലാവസ്ഥാ മാറ്റത്തിന്റെ ഭാഗമായി ആരോഗ്യ പ്രയാസങ്ങള്‍ ഉണ്ടാകാതിരിക്കാന്‍ മുന്‍കരുതല്‍ വേണമെന്നും മന്ത്രാലയം മുന്നറിയിപ്പ് നല്‍കി.

997 എന്ന നമ്പറില്‍ തുടരെ വിളിച്ചാല്‍ മാത്രമാകും മറുപടി ലഭ്യമാവുക. അല്ലാത്ത പക്ഷം ഫോണുകളില്‍ ഇന്‍സ്റ്റാള്‍ ചെയ്ത ആപ്ലിക്കേഷനില്‍ രജിസ്റ്റര്‍ ചെയ്താല്‍ അവര്‍ തിരിച്ചു വിളിക്കുകയോ ആംബുലന്‍സ് സേവനം ലഭ്യമാക്കുകയോ ചെയ്യാം. പ്ലേസ്റ്റോറിലേ ആപ്സ്റ്റോറില്‍ നിന്നോ ആപ്ലിക്കേഷന്‍ ഇന്‍സ്റ്റാള്‍ ചെയ്യാന്‍ 997 എന്ന് സേര്‍ച്ച് ചെയ്താല്‍ മതി. ലിങ്കുകള്‍ താഴെ. ആന്‍ട്രോയി‍‍ഡ് ഫോണുകളില്‍ ഇന്‍സ്റ്റാള്‍ ചെയ്യാന്‍: https://play.google.com/store/apps/details?id=com.srca.apps.sos

ഐഫോണില്‍ ഇന്‍സ്റ്റാള്‍ ചെയ്യാന്‍: https://apps.apple.com/us/app/أسعفني/id1227196538?ls=1

ഇതല്ലാതെ പുറത്ത് അടിയന്തിര ആവശ്യങ്ങള്‍ക്ക് പുറത്ത് പോകാന്‍ രണ്ടാമത്തെ വഴി പൊതു സുരക്ഷാ വിഭാഗത്തില്‍ അപേക്ഷ നല്‍കി അനുമതി നേടലാണ്. ഇതിനായി https://tanaqul.ecloud.sa/login എന്ന ലിങ്കില്‍ ക്ലിക്ക് ചെയ്ത് അപേക്ഷ നല്‍കാം. കര്‍ഫ്യൂ സമയങ്ങളിലും യാത്രക്ക് അനുമതിയില്ലാത്ത ഘട്ടങ്ങളിലും, അടിയന്തിര ആവശ്യങ്ങള്‍ക്കായി യാത്ര അനുമതി പത്രം ഈ ലിങ്ക് വഴി നേടാം. ഇതിനായി തനാഖുല്‍ എന്ന മുകളില്‍ ലിങ്ക് നല്‍കിയ വെബ്‌സൈറ്റില്‍ പേരും, ഇഖാമ നമ്പറും, മൊബൈല്‍ നമ്പറും നല്‍കി രജിസ്റ്റര്‍ ചെയ്യണം.

മക്ക, മദീന എന്നീ പ്രദേശങ്ങളിലൊഴികെ രാജ്യത്തെ നഗരങ്ങള്‍ക്കിടയിലും , ഗവര്‍ണ്ണറേറ്റുകള്‍ക്കിടയിലും, അയല്‍പ്രദേശങ്ങള്‍ക്കിടയിലും സഞ്ചരിക്കുന്നതിന് മതിയായ കാരണങ്ങളുണ്ടെങ്കില്‍ ഇത് വഴി അനുമതി പത്രം ലഭിക്കും. വിദേശികള്‍ക്കും സ്വദേശികള്‍ക്കും ഈ സേവനം ലഭ്യമാണ്. മരണം, ആശുപത്രി സേവനം. പരിചിതമായ പ്രത്യേക സന്ദര്‍ഭങ്ങള്‍, മാനുഷിക പരിഗണനയര്‍ഹിക്കുന്ന ഘട്ടങ്ങള്‍, തുടങ്ങിയ സാഹചര്യങ്ങളിലും മറ്റ് അടിയന്തിര ഘട്ടങ്ങളിലും ഈ സേവനം ഉപയോഗിക്കാം.

ഓണ്‍ലൈനില്‍ അപേക്ഷ സമര്‍പ്പിച്ചാലുടന്‍, അപേക്ഷ സ്വീകരിച്ചതായി മൊബൈലിലേക്ക് സന്ദേശം ലഭിക്കും. അല്‍പസയത്തിന് ശേഷം യാത്രക്ക് അനുമതി ലഭിച്ചാല്‍ യാത്ര ചെയ്യേണ്ട സമയവും മറ്റ് വിശദീകരണങ്ങളുമുള്‍പ്പെടുന്ന അനുമതി പത്രവും മൊബൈലില്‍ ലഭിക്കും. അപേക്ഷ നിരാകരിക്കുകയാണെങ്കില്‍ അക്കാര്യം സംബന്ധിച്ചും അപേക്ഷകന് അറിയിപ്പുണ്ടാകും. അകമ്പടിയായി അടുത്ത ബന്ധുക്കളേയോ, സുഹൃത്തുക്കളേയോ യാത്രയില്‍ പങ്കാളികളാക്കണമെങ്കില്‍ അപേക്ഷയോടൊപ്പം അവരുടെ രേഖകളും സമര്‍പ്പിക്കേണ്ടതുണ്ട്.