സഞ്ജുവിനെ ചാമ്പ്യന്‍സ് ട്രോഫി ടീമില്‍ വേണമെന്ന് ഗംഭീർ, വേണ്ടെന്ന് രോഹിത്

ചാമ്പ്യൻസ് ട്രോഫി ടീം പ്രഖ്യാപനം വൈകിയതിന് പിന്നിൽ രോഹിത് ശർമക്കും കോച്ച് ഗൗതം ഗംഭീറിനുമിടയിലുണ്ടായ അഭിപ്രായ വ്യത്യാസങ്ങളെന്ന് റിപ്പോർട്ട്. പ്രധാനമായും വൈസ് ക്യാപ്റ്റനും വിക്കറ്റ് കീപ്പർക്കും വേണ്ടിയുള്ള ചർച്ചയാണ് നീണ്ടു പോയത്.

വിക്കറ്റ് കീപ്പറായി ടീമിൽ സഞ്ജു സാംസൺ മതിയെന്ന് ഗൗതം ഗംഭീർ വാദിച്ചപ്പോൾ ഋഷഭ് പന്ത് മതിയെന്നായിരുന്നു അജിത് അഗാർക്കറിന്റേയും രോഹിത് ശർമയുടേയും പക്ഷം. വൈസ് ക്യാപ്റ്റനായി ഹർദിക് പാണ്ഡ്യയെ ഗംഭീർ നിർദേശിച്ചപ്പോൾ ശുഭ്മാൻ ഗിൽ മതി എന്നായിരുന്നു രോഹിതിന്റേയും അഗാർക്കറിന്റേയും പക്ഷം. ഈ രണ്ട് തീരുമാനങ്ങളും പിന്നീട് അംഗീകരിക്കപ്പെട്ടു. ദേശീയ മാധ്യമങ്ങളൊക്കെ ഇക്കാര്യം റിപ്പോര്‍ട്ട് ചെയ്യുന്നുണ്ട്.

ചാമ്പ്യൻസ് ട്രോഫിയിൽ രണ്ടാം കിരീടം തേടിയാണ് ഇന്ത്യയിറങ്ങുന്നത്. ടൂര്‍ണമെന്‍റിന് മുമ്പ് ഇംഗ്ലണ്ടിനെതിരായ ടി20 ഏകദിന പരമ്പരകളിൽ ഇന്ത്യ കളിക്കുന്നുണ്ട്. ഫെബ്രുവരി 20 ന് ബംഗ്ലാദേശുമായാണ് ചാമ്പ്യൻസ് ട്രോഫിയിൽ ഇന്ത്യയുടെ ആദ്യ മത്സരം. ഗ്രൂപ്പ് ഘട്ടത്തിലെ മറ്റു മത്സരങ്ങളിൽ ഫെബ്രുവരി 23 ന് പാകിസ്താനെയും മാർച്ച് മൂന്നിന് കിവീസിനെയും ഇന്ത്യ നേരിടും.

വിജയ് ഹസാരെ ട്രോഫിയില്‍ കളിക്കാനിറങ്ങാത്തതാണ് മലയാളി താരം സഞ്ജു സാംസണ് തിരിച്ചടിയായത് എന്നാണ് സൂചന. ഇക്കാര്യത്തില്‍ ബി.സി.സി.ഐ നേരത്തേ അതൃപ്തി പരസ്യമാക്കിയിരുന്നു.

ചാമ്പ്യന്‍സ് ട്രോഫിക്കുള്ള ഇന്ത്യന്‍ ടീം ഇങ്ങനെ- രോഹിത് ശർമ ( c ), ശുഭ്മാൻ ഗിൽ (v.c) വിരാട് കോഹ്ലി, ശ്രേയസ് അയ്യർ, കെ.എൽ രാഹുൽ, ഹർദിക് പാണ്ഡ്യ, അക്‌സർ പട്ടേൽ, വാഷിങ്ടൺ സുന്ദർ, കുൽദീപ് യാദവ്, ജസ്പ്രീത് ബുംറ, മുഹമ്മദ് ഷമി, അർഷദീപ് സിങ്, യശസ്വി ജയ്‌സ്വാൾ, ഋഷഭ് പന്ത്, രവീന്ദ്ര ജഡേജ.