കൊടുംവേനലിനെ മറികടന്ന് യു.എ.ഇ.യിൽ അപ്രതീക്ഷിത മഴ
വീട്ടിനുള്ളിൽ വിങ്ങിയിരുന്ന കുഞ്ഞുങ്ങളെല്ലാം മഴയിൽ കളിക്കാനായി ഇറങ്ങിയതോടെ അവധിക്കാലം ആഘോഷവുമായി. എന്നാൽ ദുബൈയുടെ മറ്റു പല ഭാഗങ്ങളിലും ഇതിന്റെ സൂചന പോലുമില്ലാത്തത്ര വെയിൽ ചൂട് തുടരുകയായിരുന്നു.
കൊടുംവേനലിനെ മറികടന്ന് യു.എ.ഇയുടെ ചില ഭാഗങ്ങളിൽ അപ്രതീക്ഷിത മഴ. ദുബൈ, ഷാർജ, അൽഐൻ, ഫുജൈറ നഗരങ്ങളുടെ ചില ഭാഗങ്ങളെ വെള്ളിയാഴ്ച സാമാന്യം നന്നായി തന്നെ മഴ കുളിർപ്പിച്ചു.
മിർദിഫ്, റാഷിദിയ, ഇൻറർനാഷനൽ സിറ്റി എന്നിവിടങ്ങളിൽ ശക്തമായ മഴ ലഭിച്ചപ്പോൾ ദേരയിലും ഖിസൈസിലും ചെറുപെയ്ത്താണുണ്ടായത്. ഇൻറർനാഷനൽ സിറ്റിയിൽ കനത്ത കാറ്റിന്റെ അകമ്പടിയുമുണ്ടായി. സ്പോർട്സ് സിറ്റി ഉൾപ്പെടെ പല ഭാഗങ്ങളിലും ശക്തമായ പൊടിക്കാറ്റാണുണ്ടായിരുന്നത്. കനത്ത കാറ്റും മഴമൂലം ദൂരക്കാഴ്ച കുറയുകയും ചെയ്തതോടെ വാഹനയാത്രികർ ജാഗ്രത പാലിക്കണമെന്ന് റോഡ് ഗതാഗത അതോറിറ്റി മുന്നറിയിപ്പ് നൽകി.
അല്ഐന് നഗരത്തിലും ഹീലിയിലും മഴ പെയ്തതായി ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. പൊരിവെയിൽ കാരണം പുറത്തിറങ്ങി കളിക്കാൻ കഴിയാതെ വീട്ടിനുള്ളിൽ വിങ്ങിയിരുന്ന കുഞ്ഞുങ്ങളെല്ലാം മഴയിൽ കളിക്കാനായി ഇറങ്ങിയതോടെ അവധിക്കാലം ആഘോഷവുമായി. എന്നാൽ ദുബൈയുടെ ഒരു ഭാഗത്ത് കാറ്റും മഴയും തിമിർക്കുമ്പോൾ മറ്റു പല ഭാഗങ്ങളിലും ഇതിന്റെ സൂചന പോലുമില്ലാത്തത്ര വെയിൽ ചൂട് തുടരുകയായിരുന്നു.
Adjust Story Font
16