ലാന്‍ഡിങ്ങിനിടെ വിമാനത്തിന് തീ പിടിച്ച സംഭവം; വിമാന കമ്പനിക്കെതിരെ യാത്രക്കാര്‍ക്ക് കേസ് നല്‍കാമെന്ന് യു.എസ് കോടതി

രണ്ട്​ വർഷം മുമ്പ്​ ദുബൈ അന്താരാഷ്​ട്ര വിമാനത്താവളത്തിൽ ലാൻഡിങ്ങിനിടെ എമിറേറ്റ്​സ്​ വിമാനത്തിന്​ തീപിടിച്ച സംഭവത്തിൽ വിമാന നിർമാണ കമ്പനി ​ബോയിങ്ങിനെതിരെ യാത്രക്കാർക്ക്​ കേസ്​ കൊടുക്കാമെന്ന്​ യു.എസ്​ കോടതി. 2016 ആഗസ്​റ്റ്​ മൂന്നിനായിരുന്നു തിരുവനന്തപുരത്തുനിന്ന്​ നിരവധി മലയാളികൾ ഉൾപ്പെടെ 282 യാത്രക്കാരുമായി വന്ന വിമാനത്തിന്​ തീപിടിച്ചത്.

വിമാനത്തി​ന്റെ രൂപകൽപനയിലെ അപാകത കാരണം സംഭവിച്ച അപകടമാണിതെന്ന വാദമുന്നയിച്ചാണ്​ യു.എസിലെയും യു.കെയിലും അഭിഭാഷകർ മുഖേന ബോയിങ്​ കമ്പനിക്കെതിരെ കേസ്​ കൊടുത്തത്​​. കുറഞ്ഞത്​ 15 യാത്രക്കാർ വിമാനക്കമ്പനിക്ക്​ എതിരെ കേസ്​ കൊടുത്തതായാണ്​ വിവരം. കേസ്​ ​കൊടുക്കാൻ യാത്രക്കാർക്ക്​ അവകാശമുണ്ടെന്നാണ്​ യു.എസ്​ കോടതി വിധി.

കേസ്​ കൊടുക്കുന്നെങ്കിൽ തന്നെ അത്​ യു.എ.ഇയിലെ കോടതിയിലാണ്​ വേണ്ടതെന്ന നിലപാടാണ്​ ബോയിങ്​ കമ്പനിയുടേത്​. എന്നാൽ ഇൗ വാദം കോടതി അംഗീകരിച്ചില്ല. വിധിക്കെതിരെ അപ്പീലിന്​ പോകാനുള്ള തീരുമാനം കമ്പനി ഇതുവരെ അറിയിച്ചിട്ടില്ല. കേസ്​ നടപടികൾ പൂർത്തിയാകാൻ രണ്ട്​ വർഷമെങ്കിലും വേണ്ടി വരും.

അഞ്ച്​ വിമാന ജീവനക്കാർക്കും 16 യാത്രക്കാർക്കും അപകടത്തിൽ പരിക്കേറ്റതായി യു.എ.ഇ ജനറൽ സിവിൽ ഏവിയേഷൻ അതോറിറ്റിയുടെ പ്രാഥമിക റിപ്പോർട്ടിൽ വ്യക്​തമാക്കിയിരുന്നു. പരിക്കേറ്റവരിൽ പത്തോളം മലയാളികളുമുണ്ടായിരുന്നു.

നാല്​ വിമാന ജീവനക്കാരുടെ പരിക്ക്​ ഗുരുതരമായിരുന്നു. എട്ട്​ അഗ്നിശമന ​സേനാംഗങ്ങളും ചെറിയ പരിക്കുകൾക്ക്​ ചികിത്സ തേടിയിരുന്നതായി റിപ്പോർട്ട്​ വ്യക്​തമാക്കുന്നു.

തിരുവനന്തപുരത്ത് നിന്ന് 2016 ആഗസ്​റ്റ്​ മൂന്നിന്​ രാവിലെ 10.19ന് ദുബൈക്ക് തിരിച്ച എമിറേറ്റ്സ് ഇ.കെ. 521 വിമാനമാണ് അപകടത്തിൽ പെട്ടത്. 1985ൽ തുടക്കം കുറിച്ച എമിറേറ്റ്സ് എയർലൈൻസിന്റെ 31 വർഷത്തെ ചരിത്രത്തിലെ ഏറ്റവും വലിയ അപകടമാണിത്.

20 രാജ്യങ്ങളിൽ നിന്നുള്ള യാത്രക്കാർ വിമാനത്തിലുണ്ടായിരുന്നു. 226 ഇന്ത്യക്കാരിൽ ഭൂരിഭാഗവും മലയാളികളായിരുന്നു.