ഗസ്സ വെടിനിർത്തൽ കരാറിലെ മൂന്നാംഘട്ട ബന്ദി കൈമാറ്റം ഇന്ന്; ട്രംപിന്റെ പശ്ചിമേഷ്യൻ പ്രതിനിധി ഇസ്രായേലിൽ

ഗസ്സസിറ്റി: വെടിനിർത്തൽ ആദ്യഘട്ടത്തിന്‍റെ ഭാഗമായുള്ള മൂന്നാമത്​ ബന്ദികൈമാറ്റവും തടവുകാരെ വിട്ടയക്കലും ഇന്ന്.

അർബൽ യെഹോദ്​ ഉൾപ്പെടെ മൂന്ന്​ വനിതാ ബന്ദികളെയും അഞ്ച് തായ്​ലാന്‍റ്​ തൊഴിലാളികളെയും ഇന്ന്​ മോചിപ്പിക്കുമെന്ന്​ ഹമാസ്​ അറിയിച്ചു. 29കാരി അർബൽ യെഹോദിനു പുറമെ എൺപതു വയസുള്ള ഗാദി മോസസ്​, ഇസ്രായേൽ വനിതാ സൈനിക അഗാം ബെർഗർ എന്നിവരെയാണ്​​ ഇന്ന്​ ഹമാസ്​ കൈമാറുക. ശനിയാഴ്ച നടക്കേണ്ട ബന്ദിമോചനം ഇസ്രായേൽ ആവശ്യപ്രകാരം മധ്യസ്ഥ രാജ്യങ്ങളുടെ ഇടപെടലിനെ തുടർന്ന്​ ഇ​ന്നേക്ക്​ മാറ്റുകയായിരുന്നു.

അതിനിടെ അമേരിക്കൻ പ്രസിഡന്‍റ്​ ഡോണൾഡ്​ ട്രംപിന്‍റെ പശ്ചിമേഷ്യന്‍ പ്രതിനിധി സ്റ്റിവ്​ വിറ്റ്​കോഫ്​ ഇസ്രായേലി​ലെത്തി നേതാക്കളുമായി ചർച്ച ആരംഭിച്ചു. ഗസ്സയിലെ നെത്​സറിം, ഫിലാഡൽഫി ഇടനാഴികളിലും അദ്ദേഹം സന്ദർശനം നടത്തി. ഈ മാസം 19ന്​ നിലവിൽ വന്ന വെടിനിർത്തൽ കരാറിന്‍റെ പുരോഗതി വിലയിരുത്തുകയും തുടർ ചർച്ചകൾക്ക്​ വഴിയൊരുക്കുകയുമാണ്​ സ്റ്റിവ്​ വിറ്റ്​കോഫിന്‍റെ സന്ദർശന ലക്ഷ്യം.

വെടിനിർത്തൽ കരാറിന്‍റെ രണ്ടും മൂന്നും ഘട്ടങ്ങൾ സംബന്ധിച്ച് ഔപചാരിക ചർച്ച തിങ്കളാഴ്ച ദോഹയിൽ ആരംഭിക്കാനിരിക്കെ, ഇസ്രായേൽ പ്രധാനമന്ത്രി ബിന്യമിൻ നെതന്യാഹുവുമായുള്ള സ്റ്റിവ്​ വിറ്റ്​കോഫിന്‍റെ കൂടിക്കാഴ്​ച നിർണായകമാകും.

മൂന്ന്​ ദിവസം മുമ്പാണ്​ ഫലസ്തീനികൾക്ക്​ വടക്കൻ ഗസ്സയിലേക്ക്​ മടങ്ങാൻ ഇസ്രായേൽ അനുമതി നൽകിയത്​. ഇതിനകം അഞ്ച് ലക്ഷത്തിലേറെ ഫലസ്തീനികളാണ്​ വടക്കൻ ഗസ്സയിൽ തിരിച്ചെത്തിയത്.​പതിനഞ്ചു മാസം നീണ്ട യുദ്ധത്തിലൂടെ ഇസ്രായേൽ തകർത്തെറിഞ്ഞ പ്രദേശത്ത്​ തിരിച്ചെത്തിയ ഇവരുടെ ജീവിതം കൂടുതൽ ദുരിതപൂർണമാണ്​. 'യുനർവ' ഏജൻസിക്ക്​ ഇസ്രായേൽ വിലക്ക്​ ഏർപ്പെടുത്തിയത്​ ഗസ്സയിലുടനീളം ഭക്ഷ്യസഹായ വിതരണവും പ്രതിസന്ധിയിലാക്കി.

യുനർവ വിലക്ക്​ ഉടൻ പിൻവലിക്കണമെന്ന്​ യുഎന്നും അറബ്​ മുസ്​ലിം രാജ്യങ്ങളും ആവശ്യപ്പെട്ടു.