ഹൂത്തി ഭീകരർക്കെതിരെ തിരിച്ചടി ഉറപ്പെന്ന്​ യുഎ.ഇ

അബൂദബിയിലെ രണ്ടിടങ്ങളിൽ ഇന്നലെയുണ്ടായ സ്ഫോടനങ്ങൾക്കു പിന്നൽ പ്രവർത്തിച്ച യെമനിലെ ഹൂത്തികൾക്കെതിരെ ശക്തമായ പ്രത്യാക്രമണവുമായി സൗദി സഖ്യരാജ്യങ്ങൾ. ഭീകരർക്കെതിരെ തിരിച്ചടി ഉറപ്പാണെന്ന്​ യുഎ.ഇ നേതൃത്വം മുന്നറിയിപ്പ്​ നൽകി. കൊല്ലപ്പെട്ട രണ്ട്​ ഇന്ത്യക്കാരുടെ മൃതദേഹങ്ങൾ വിട്ടുകിട്ടാൻ എംബസിയുടെ നേതൃത്വത്തിൽ ശ്രമം ഊർജിതമാണ്​. ഇന്നുതന്നെ മൃതദേഹം കൈമാറിയേക്കും

അബൂദബി വ്യവസായ മേഖലയായ മുസഫയിൽ മൂന്ന്​ പെട്രോളിയം ടാങ്കുകൾ പൊട്ടിത്തെറിച്ചുണ്ടായ സ്ഫോടനത്തിലാണ്​ രണ്ട്​ ഇന്ത്യക്കാർ ഉൾപ്പെടെ മൂന്ന്​ പേര്‍ കൊല്ലപ്പെട്ടത്. കൊല്ലപ്പെട്ട ഇന്ത്യക്കാരുടെ വിശദവിവരങ്ങൾ അറിവായിട്ടില്ലെന്ന്​ ഇന്ത്യന്‍ എംബസി പ്രതികരിച്ചു. പാകിസ്​താൻ പൗരനാണ്​ മരിച്ച മൂന്നാമ​ത്തെയാൾ. പരിക്കേറ്റ 6 പേർ വിവിധ ആശുപത്രികളിൽ ചികിൽസയിലാണ്​. യു.എ.ഇ മണ്ണിൽ നടന്ന ആക്രമണത്തിന്​ തക്കശിക്ഷ നൽകാതിരിക്കില്ലെന്ന് യു.എ.ഇ വിദേശകാര്യ മന്ത്രാലയം മുന്നറിയിപ്പ്​ നൽകി. പിന്നിട്ട 24 മണിക്കൂറിനുള്ളിൽ 230 ഹൂത്തി ഭീകരരെ വധിച്ചതായി സൗദി സഖ്യസേന വ്യക്​തമാക്കി. മആരിബിലും സൻആയിലും വൻ ആക്രമണമാണ്​ തുടരുന്നത്​.

അതിനിടെ യെമനിൽ അധിനിവേശം നടത്തുന്നവർക്കെതിരെ കൂടുതൽ ശക്​തമായ ആക്രമണങ്ങൾ തുടരുമെന്ന്​​ ഹൂത്തി വിഭാഗം അറിയിച്ചു. യു.എ.ഇക്ക്​ നേരെ നടന്ന ആക്രമണത്തെ അമേരിക്കയും യൂറോപ്യൻ യൂനിയനും അപലപിച്ചു. മേഖലയുടെ സമാധാനം തകർക്കുന്ന ആക്രമണമാണിതെന്നും യു.എ.ഇയുടെ സുരക്ഷയ്ക്ക്​ പൂർണ പിന്തുണ നൽകുമെന്നും വിവിധ ലോക രാജ്യങ്ങൾ ചൂണ്ടിക്കാട്ടി. എല്ലാ ഗൾഫ്​ രാജ്യങ്ങളും യു.എ.ഇക്ക്​ പിന്തുണ പ്രഖ്യാപിച്ചു. ആക്രമണത്തെ അറബ്​ ലീഗ്​ അപലപിച്ചു.