2050 വരെ ലോകത്തിലെ ഏറ്റവും വലിയ എല്‍.എന്‍.ജി കയറ്റുമതി രാജ്യമെന്ന സ്ഥാനം ഖത്തർ നിലനിർത്തും; ജി.ഇ.സി.എഫ്

ലോകത്തിലെ ഏറ്റവും വലിയ എല്‍.എന്‍.ജി കയറ്റുമതി രാജ്യമെന്ന സ്ഥാനം 2050 വരെ ഖത്തർ നിലനിർത്തുമെന്ന് പ്രതീക്ഷിക്കുന്നതായി ഗ്യാസ് കയറ്റുമതി രാജ്യങ്ങളുടെ സംഘടനയായ ജി.ഇ.സി.എഫ്. ഖത്തറിനൊപ്പം ഇറാനും പശ്ചിമേഷ്യയിലെ വലിയ ഗ്യാസ് കയറ്റുമതി ശക്തിയായി വളരുമെന്നും ജി.ഇ.സി.എഫ് പുറത്തിറക്കിയ റിപ്പോര്‍ട്ടില്‍ പറയുന്നു. ഗ്യാസ് എക്‌സ്‌പോർട്ടിംഗ് കൺട്രീസ് ഫോറം (ജി.ഇ.സി.എഫ്) പുറത്തിറക്കിയ റിപ്പോര്‍ട്ടിലാണ് ഇക്കാര്യങ്ങള്‍ വിശദീകരിക്കുന്നത്.

നിലവിൽ ഖത്തർ ഏറ്റവും വലിയ എൽ.‌എൻ‌.ജി കയറ്റുമതിക്കാരാണ്. 2027 ഓടെ അതിന്‍റെ ദ്രവീകരണ ശേഷി 126 എം.‌ടി.‌പി.‌എ (പ്രതിവർഷം ദശലക്ഷം ടൺ) ആയി ഉയർത്താനുള്ള പരിശ്രമത്തിലാണ് ഖത്തര്‍. ഇതോടെ ലോകത്തിലെ ഏറ്റവും മികച്ച എൽ.‌എൻ‌.ജി കയറ്റുമതിക്കാരായി ഖത്തർ സ്ഥാനം നിലനിർത്തുമെന്നാണ് റിപ്പോര്‍ട്ട് പറയുന്നത്. പശ്ചിമേഷ്യയിലെ പ്രകൃതിവാതക ഉൽപാദനത്തിന്‍റെ വളർച്ചയിൽ ഇറാനും ഗണ്യമായ സംഭാവന നൽകും.

ആഗോള വാതക ഉൽപാദനത്തിന്‍റെ 17 ശതമാനത്തോളം സംഭാവന ചെയ്യുന്ന മിഡിൽ ഈസ്റ്റ് വടക്കേ അമേരിക്കയ്ക്കും യുറേഷ്യയ്ക്കും ശേഷം ലോകമെമ്പാടുമുള്ള മൂന്നാമത്തെ വലിയ വാതക ഉൽപാദക മേഖലയാണ്. ഗള്‍ഫ് മേഖലയിലെ പ്രകൃതിവാതകത്തിനായുള്ള വർധിച്ചുവരുന്ന ആവശ്യവും അയൽ രാജ്യങ്ങളിലേക്ക് പ്രകൃതിവാതകം കയറ്റുമതി ചെയ്യാനുള്ള സാധ്യതയും എൽ‌.എൻ.‌ജി കയറ്റുമതിയുടെ ആഗോള സാധ്യതയുമാണ് മേഖലയിലെ വാതക ഉൽപാദനത്തിന്‍റെ വ്യാപനത്തിന് പ്രധാന കാരണം.

ഗാവർ എണ്ണമേഖലയിൽ ഉൽപാദന നിലവാരം ഉയർത്താൻ സൗദി അറേബ്യ ശ്രമിക്കുന്നുണ്ട്, കൂടാതെ പാരമ്പര്യേതര ഉൽപാദനത്തിൽ നിക്ഷേപം നടത്താനുള്ള ഉദ്ദേശ്യവും പ്രഖ്യാപിച്ചിട്ടുണ്ട്, ഇത് മൊത്തത്തിലുള്ള ഉൽപാദനത്തിൽ ഗുണപരമായ മാറ്റമുണ്ടാക്കുമെന്ന് പ്രതീക്ഷിക്കുന്നു. 2050 ഓടെ ഈ മേഖലയിലെ പ്രകൃതിവാതക ഉൽപാദനം 1150 ബി.സി.എമ്മിൽ കൂടുതൽ ഉയരുമെന്ന് റിപ്പോർട്ട് പ്രതീക്ഷിക്കുന്നു. അപ്പോഴേക്കും ആഗോള വിപണിയിൽ വാതക ഉൽപാദനത്തിൽ ഈ മേഖലയുടെ വിഹിതം 19.4 ശതമാനമായി ഉയരുമെന്നും ജി.ഇ.സി.എഫിന്‍റെ റിപ്പോര്‍ട്ടില്‍ പറയുന്നു.