നിറം നോക്കി മാമ്പഴം വാങ്ങല്ലേ! നല്ല മധുരമുള്ള മാമ്പഴം എങ്ങനെ തിരിച്ചറിയാം?

പഴങ്ങളുടെ രാജാവാണ് മാമ്പഴം. വ്യത്യസ്ത നിറങ്ങളിലും ആകൃതികളിലും വലുപ്പങ്ങളിലുമുള്ള 1500-ലധികം ഇനം മാമ്പഴങ്ങൾ ഇന്ന് ഇന്ത്യയിലുണ്ട്. മാമ്പഴക്കാലത്ത് മാർക്കറ്റിൽ നിന്നും കടകളിൽ നിന്നും നല്ല മധുരവും നാടൻ രുചിയുമുള്ള മാമ്പഴങ്ങൾ തെരഞ്ഞെടുക്കുന്നത് ഇത്തിരി ബുദ്ധിമുട്ടുള്ള കാര്യമാണ്. ഭംഗി നോക്കി വാങ്ങിയാൽ ചിലപ്പോൾ ഗുണമുണ്ടാകില്ല. ചില കാര്യങ്ങൾ ശ്രദ്ധിച്ചാൽ നല്ല മാമ്പഴം തെരഞ്ഞെടുക്കാൻ സാധിക്കും. മാമ്പഴത്തിന്‍റെ മണം, തൊടുമ്പോഴുള്ള മൃദുത്വം, നിറം, ഭാരം എന്നിവയിലെ ചില സൂക്ഷ്മമായ ലക്ഷണങ്ങൾ നല്ല മാമ്പഴം തെരഞ്ഞെടുക്കാൻ നിങ്ങളെ സഹായിക്കും.

സുഗന്ധം പരിശോധിക്കുക- മാമ്പഴത്തിന്റെ നിറത്തേക്കാൾ പ്രധാനം അതിന്റെ മണമാണ്. നന്നായി പഴുത്ത മധുരമുള്ള മാമ്പഴങ്ങൾക്ക് തണ്ടിനടുത്തായി നല്ല മധുരമുള്ള ഫ്രൂട്ടി സുഗന്ധമുണ്ടായിരിക്കും. ഇത്തരത്തിലുള്ള മണം അനുഭവപ്പെടുന്നുണ്ടെങ്കിൽ മാമ്പഴം കഴിക്കാൻ പാകത്തിന് പഴുത്തതാണെന്ന് ഉറപ്പിക്കാം.

ചെറുതായി അമർത്തി നോക്കുക- ഒരു പീച്ച് പഴം തൊട്ടുനോക്കുന്നതുപോലെ മാമ്പഴത്തിൽ പതുക്കെ അമർത്തി നോക്കുക. നേരിയ തോതിൽ അമരുമെങ്കിലും സാമാന്യം ഉറപ്പുള്ളതാണെങ്കിൽ അത് പാകത്തിന് പഴുത്തതാണ്.

ഒഴിവാക്കേണ്ടവ- അമിതമായി കടുപ്പമുള്ളതും അല്ലെങ്കിൽ കയ്യിൽ തട്ടുമ്പോൾ തന്നെ വളരെയധികം കുഴഞ്ഞുപോകുന്നതുമായ മാമ്പഴങ്ങൾ ഒഴിവാക്കുക. പാകത്തിന് പഴുക്കാത്ത മാമ്പഴങ്ങൾക്ക് പുളിപ്പും അല്പം ചവർപ്പ് രുചിയുമായിരിക്കും.

മാമ്പഴം വാങ്ങുമ്പോൾ വലിപ്പം മാത്രം നോക്കിയാൽ പോരാ, അതിന്റെ ഭാരവും കൂടെ ശ്രദ്ധിക്കണം. കയ്യിലെടുക്കുമ്പോൾ നല്ല ഭാരം തോന്നുന്ന മാമ്പഴങ്ങളിലാണ് കൂടുതൽ നീരും മധുരവും ഉണ്ടാകുക. പഴുക്കാത്തതോ അല്ലെങ്കിൽ ഉൾഭാഗം വരണ്ടതോ ആയ മാമ്പഴങ്ങൾക്ക് ഭാരം കുറവായിരിക്കും. അതിനാൽ കയ്യിലെടുക്കുമ്പോൾ ഭാരം കുറവായി തോന്നുന്നവ ഒഴിവാക്കുന്നതാണ് നല്ലത്.

ചുളിവുകളോ കറുത്ത പാടുകളോ ഉള്ള മാമ്പഴങ്ങൾ അമിതമായി പഴുത്തതോ, ചതഞ്ഞതോ, കേടുപാടുകൾ സംഭവിച്ചതോ ആകാം. ഇത് പഴത്തിന്റെ രുചിയെയും ഗുണനിലവാരത്തെയും ബാധിക്കും.